Titel: Belangrike Bespreking(GEBEDSKRING)

Graag wil ek al die Woes skrywers vra om deel te neem aan bogenoemde bespreking
en asseblief ’n mening te lug.

Ek het verlede jaar al reeds vroeg nadat ek by Woes aangesluit het, besef daar is mense wat deurentyd ’n krisis beleef en dit het vir my duidelik geword dat ons hieraan moet aandag gee. Ek het self so ’n krisis deurleef en my gedig met die naam
‘My Beproewing’, die lig laat sien op 2006-09-06. Na baie oorweging het ek met Willem kontak gemaak en dit met hom bespreek.

’n Gebedskring is baie ernstige saak en dit moet met die regte gesindheid benader word. Ons mag nie kleinlik raak en sommer net enige nietigheid gebruik daarvoor nie. Dit is immers ’n gesprek met ‘GOD’ en ons moet dit met die nodige respek en die regte gesindheid benader. Ons vra ook dat God ons die nodige leiding en krag sal gee, en hierdie poging sal seën, anders sal dit nie moontlik wees om ’n sukses daarvan te maak nie. Indien hierdie geleentheid misbruik word, SAL Willem dit onmiddellik verwyder.

Die gedagte is dat ons byvoorbeeld op ’n Dinsdag en Donderdag dan mense se name met hul toestemming kan plaas. Mense wat siek is of enige ernstige krisis beleef, ons kan dan vir hulle bid. Ek is nog nie seker of daar oop gebede geplaas gaan word nie. Miskien kan elkeen in sy eie binnekamer bid. Ons sal dit nog moet uitklaar. Op Maandae word die vorige week se name dan verwyder en ons kan weer nuwe name plaas. Moontlik kan ons ook dan iemand spesifiek vra om op Maandag ’n oop gebed te plaas om die week mee te open. Dit is in ’n neutedop gestel. Hier onder is ’n paar vrae wat jy kan antwoord indien verkies.

Ons moet nou oor die volgende besluit.

1. Is jy ten gunste van so ’n GEBEDSKRING?
2. Glo jy dit sal vir die regte doeleindes aangewend word?
3. Sal jy gebruik maak van hierdie geleentheid?
4. Het jy enige ander voorstel in hierdie verband?

Voel asseblief vry om hierop kommentaar te lewer en insette te lewer. Dit raak almal wat betrokke is by Woes. Baie dankie.
Christal
2007/03/09