Op Woes.co.za onder Gedigte

Wagtend op die einde

Die son sak reeds in rooi,
ek wag om te sien
wanneer die donkerte oor die woesteny gaan daal...
Gaan daar skemer wees?
Of gaan alles net verdwyn met 'n helder flits?
Die groot knal wat alles wat is omskep in niks!
Sal daar enige energie uitgestraal word,
of sal die groot grys nul net die ene opvreet
en dikgevreet op die kuberbank gaan lê en snork?
Tik tik tik...
Geen gravitasie,
geen tyd...
geen letters,
geen sinne,
geen gedagtes,
geen denke,
geen taal...
Die begin van NIKS!
Uit iets tot niks.

****************

Ek wag...
Dat niks iets word wat gebeur.
Woes was iets,
woes word weer woesteny.
'n Groot virtuele niks op die wêreldwye web.
Sal dit 'n gat in die virtuele niks laat?
Hoe maak mens 'n gat in niks?
Gat met 'n rand van niks is mos nie 'n gat nie.
Ek wag steeds (effe ongeduldig)
dat niks tot niks moet terugkeer.
Die wêreld was woes en leeg...
So is dit steeds.
Daar's niks nuuts onder die son nie!
Bron: http://www.woes.co.za/bydrae/gedig/wagtend-op-die-einde
Woordverwerker

Ek is lief vir my moedertaal, Afrikaans. Ek is lief vir woorde, hoewel ek nie formele naskoolse taalkundige opleiding het nie.
Ek skryf soos dinge by my opkom, nie noodwendig met 'n vooraf besluit nie. Soms begin ek iets, dan voel dit of die gedig homself sommer skryf.
Die probleem is meestal om dit kort te hou. Ek volg soms 'n pad wat baie draaie loop.

Ek is 'n boer van beroep, sommiges sou sê 'n Boer in murg en been..

Ek geniet die mitologie, raaisels, metafore, geskiedenis, die natuur, tegnologie, ou goed, nuwe dinge..
En soos iemand hier op WOES my geheue verfris het: Surrealisme. ;-)


Ek sal dit waardeer as die lesers hulle opinie uitspreek. As jy nie van iets hou nie, sê dit! Dit is net deur kritiek wat mens kan leer.



Totale stukke publiseer: 351
Totaal kere gelees: 0
Totaal kommentaar: 2,350