Op Woes.co.za onder Rubrieke

Goen, Groen, Groen

Groen is ‘n snaakse kleur, want hy kan wissel van donker groen, lig groen tot see groen. Mens kan groen word van jaloesie of jy kan groen wees as jy gelukkig is. My eerste gedagte aan groen is my ouma se plaaskombuis en so was ook die meeste kombuise van die ou dae groen. Wel toe het jy net ‘n paar kleure verf gekry. Dit was “Signal red, Golden brown, Cream, Royal blue of Green”. Uit al dit was groen seker maar die beste keuse vir die kombuis. As ek dink aan haar, haar groen kombuis en die gelukkige dae wat ek saam met haar geniet het dan is die kleur groen vir my ‘n gelukbringer.

As jy in ‘n groen landskap woon sien jy later die groen nie meer so maklik raak nie, maar as jy in ‘n woestyndorp soos Swakopmund woon en jy reis na die Swartland en Overberg as die graan groen op die lande staan dan besef jy die intensiteit van daardie groen. Dan besef jy dat groen beteken lewe. Dit beteken groei. Dit beteken graankos wat lewe gee. Dan is die groen somtyds vir jou oorweldigend en voel jy dat jy daar op daardie golwende groen kan gaan rol en rol sonder ophou. Soos ‘n kind wat rol op gras as hy speel en gelukkig is. As boorling van die Overberg het dit my nooit so opgeval dat groen ‘n teken van lewe is nie. Dit was eers nadat ek in Swakopmund, ‘n woestyndorp gewoon het dat ek die groen regtig kon waardeer. Moet my nie verkeerd verstaan nie. Ek het ook lief geword vir die woestyn, want die woestyn het ‘n heel anderste spesiale bekoring. Daar het jy ook polletjies groen gekry, maar dit was wyd en ver tussenin en jy moes behoorlik soek daarvoor.

Die see kan ook wissel van seegroen tot blou tot swart. Ek hou egter van die seegroen kleur van die see. Veral as dit daardie ligte groen maak as die seewater teen die rotse slaan en die seeskuim met die water meng dat jy daardie ligte seegroen kleur kry. Dit is altyd ‘n aanduiding dat daar moontlik ‘n paar galjoene daar onder rondswem in die lig groen skuimwater wat net wag vir jou vissermans hoek.

As jy my regtig groen wou sien van jaloesie dan was dit as jy gaan visvang en jy staan daar die hele oggend en hengel en dan kom daar ‘n vreemde ou en gooi op jou plek in terwyl jy aas aansit en hy vang ‘n groot vis met sy eerste gooi. Dan voel jy dat jy kan word soos die “Incredible Hulk” in daardie bioskoop prent. Dat jy groen kan word soos hy, uit jou klere kan bars en daardie ou met sy vistok en al in die see kan boender en sy vis vat.

Ek het die ondergenoemde gediggie geskryf in Junie 2009 oor die dag se kleure en daarin het ek gemeld dat as die dag groen is dan voel ek lus vir werk. Dit is die dae waar die MG my nie te kwaai beet het nie en ek maklik asem kan haal. Sout is belangrik in die lewe want kos sonder sout is nie lekker nie. Die Bybel se ook ons is die sout van die aarde. So groen en sout behoort dus volgens my bymekaar.

As ek die dag lus voel vir hard werk dan sny ek gras en daar is vir my niks mooier as 'n vars gesnyde groen mat van gras in die tuin en die heerlike reuk van vars gesnyde gras.



DAG SE KLEURE


Verskillende kleure.
Verskillende geure.
Elke dag van die week,
het ‘n kleur en geur met dagbreek.
Party dae smaak soet.
Ander van suur tot sout.
Elke dag het ‘n ander geur.

Party is hartseer dan wil jy treur.
Die dag smaak dan suur.
Die kleur is swart.
en bring net smart.

Ander dae is groen,
dan wil ek baie doen.
Die dag is dan sout,
en word ek nie benoud

Is die dag geel,
is ek vrolik en heel.
Dit smaak dan soet,
en wil ek hom gladnie groet.

Is die dag grou
Is dit een wat ek nie van hou.
Dit smaak dan bitter,
en hoop ek hy word witter.

Is die dag rooi,
weet ek hy gaan my looi.
Dan bly ek liewer in die kooi,
want dan smaak hy soos strooi.

Maandae is gewoonlik blou.
Dis hoekom ek nie van hulle hou.
Dit smaak gewoonlik frank.
Neem hom maar met ‘n doppie drank.

Sondae is gewoonlik wit
Dan wil ek in die kerk of aan eettafel sit
Dit smaak gewoonlik lekker.
Dan hoef ek nie op te staan met ‘n wekker

Bron: http://www.woes.co.za/bydrae/rubriek/goen-groen-groen-groen
schatz

Ek is 'n 1948 model, getroud (jonk van gees) wat hoofsaaklik vir plesier, my vrou , kinders en vriende skryf.  Ek was in Paarl  ( HJS - Galpil) op skool en daarna vir 2 jaar Hermanus Hoërskool. Ek het op 50 jarige ouderdom, om gesondheidsredes, besluit om 'n beroep in die munisipale wese te verruil vir 'n landbou gedrewe beroep en bedryf 'n vrugte droog maatskappy in die Klein Karoo.  Op 60 jarige ouderdom is ek na vele  verkeerde diagnoses positief gediagnoseer as een van omtrent 156 mense in die land met MG (myasthenia Gravis)  Dit het my beweging aansienlik ingekort en ek het begin skryf en skilder as tydverdryf.  Ek kon nie meer voortgaan met die vrugte droog nie en ons bestuur tans 'n fabriek wat vrugtelekkers vervaardig. Ek skryf hoofsaaklik oor persoonlike lewenservarings en ondervindings.  Baie van die skryfwerkies het 'n Christelike boodskap en verskeie mense het reeds versoek om dit te lees.  Ek skryf hoofsaaklik  in gewone "plat"  praat Afrikaans maar het ook 'n paar Engelse stukkies geskryf.  My styl is ondervang in "Digresep".
Ek verwelkom eerlike kommentaar en  kopiereg  voorbehou.
Wat is schatz  ?  Kom ek stel dit so "It takes two to tango" en schatz beteken liefling of skattebol in Duits.  Ek is schatz vir my vrou en my vrou is schats vir my ! Sy is duitsmagtig.  Ek skryf en lewer kommentaar. Sy doen die "e-posse" en checking.  Ek is afrikaans en sy is engels, maar ons huistaal is Afrikaans.  Dus is dit boertjie en rooinek wat hier saamwerk.  Goeie genugtig nê ! Kan jy dit glo ?  Ons kom nogal goed oor die weg.  Waarom skryf ek ? En waarom soek ek kommentaar ?  Kom ek verduidelik dit so : 
Skryf is soos my koffie en tee.
Die suiker en melk is wat julle gee.
Koffie en tee sonder suiker is bitter.
Melk maak die tee skoner en witter.
Die lewe is klaar swart en bitter.
Kommentaar maak harte skoner en witter.
Suiker neem weg lewens bitter.
Lekker man, dis lekker, ek dink.
Om soet, wit koffie en tee te drink.
So hou aan met skink
Dit hou die lewe lekker blink.
Aitsa ! - Hoe klink dit ?
 



Totale stukke publiseer: 213
Totaal kere gelees: 0
Totaal kommentaar: 638