Op Woes.co.za onder Woes-Nuus

Vandag in Woorde: Bly

Vandag in woorde se tema vir hierdie week is ‘Bly’. Dis ’n baie klein woordjie met ’n hele paar verskillende betekenisse. Die eerste begrip wat by my opkom is vreugde, gelukkigheid, oorstelptheid, blydskap. Dan voel ek my genoop om te sê hoe bly my hart was oor al die bydraes wat julle dierbare Woesters gemaak het tot verlede week se ‘MASKERS’ tema. Ek gee staande applous aan ieder en elk!

In die lewe is daar so baie dinge wat my bly maak. Nie noodwendig groot goed wat baie geld kos nie, alhoewel ’n Audi TT my ook vreeslik bly sal maak. Hoor jy Bokka?

Vat nou maar gistermiddag. Ek kan nie eers voluit verduidelik hoe bly my hart was toe Bokka hier aankom met ’n sakkie vol swart Wilson toffies, nie. Man, ek vertel jou ek het gejubel en gejuig, want dis nie iets wat mens aldag hier in die bos raakloop nie.

Is daar iets so klein soos ’n toffie wat jou bly kan maak? Vertel ons daarvan. Dalk sien ons dan ook die klein goedjies raak wat groot blydskap bring.

’n Ander blye dag wat ek altyd sal onthou is die dag dat ’n vreemde stem oor die foon my meegedeel het dat daar ’n beurs aan ons seuna toegeken is. Al sy studies, boeke en verblyf kon betaal word. Ek was alleen my kantoor. Toe ek daai foon neersit, was ek eers vir ’n paar sekondes stil om die nuus te laat insink. Daarna het ek tegelyk getrippel-dans en uit volle bors, ’n dankgebed gejubel.

Vertel ons van die nuus wat jou al só bly gemaak het.

Daar is ’n ‘bly’ wat mens laat jil en daar is ’n ‘bly’ wat mens net rustig laat glimlag. Soms is dit eerbied en soms is dit tevredenheid. Soms is dit trots en soms is dit dankbaarheid. Jy weet mos wat ek bedoel. Vertel ons van die dinge, gebeure, geleenthede en mense in jou lewe wat jou doelbewus of onwillekeurig bly maak.
Sing dit uit in geskrewe woorde! Gorrel dit of dig dit. Of vertel sommer maar net.

Mooi loop en wees hierdie week aspris bly.

Bos-groetnis
Kiekies


Bron: http://www.woes.co.za/bydrae/woes-nuusstuk/vandag-in-woorde-bly-bly
Kreatiewe bestuurder

Die doel van die Woes Kreatiewe Bestuurder (KB) is om te verseker dat alle gebruikers tuis voel, bestaande standaarde gehandhaaf word en ook om te verseker dat Woes voortdurend beter en meer gebruikersvriendelik word as wat dit reeds is.

Ons moet in gedagte hou dat Woes ‘n bymekaarkomplek van kreatiewe siele is.  Dis die plek waar jy jou mees intieme gedagtes, woorde en drome met ander mense deel. Jy skep kuns met woorde en dis opsigself ‘n edel gawe, iets wat jou onderskei van miljoene ander mense. Dis belangrik dat ons mekaar in daardie opsig respekteer, waardeer en kreatiewe kommentaar op mede-skrywers en -digters se werk lewer.

Jy is deel van Woes omdat jy jou werk met ander wil deel, omdat jy tuis voel en jou werk waardig ag om gedeel te word. Akkolade vir jou! Dis soveel beter as om jou  kosbare werk iewers in die donker laai van jou lessenaar onder ‘n laag stof te bêre, is dit nie?  Laat jou werk asem haal en leef, dis waarvoor Woes daar is!

Kom woon gerus ons Woes Woord & Wyn aande by, waar digters hul gedigte self voordra en hul woorde werklik lewe laat kry! Ons hou van nou af ook boekbekendstellings en wag op voorstelle vanaf jou.

Jajaja, nou wonder julle seker wie hierdie persoon is wat soveel te sê het ... My naam is Carol Williams en ek is al jare lank reeds ‘n Woester in my hart, lyf en skryf.

Lank, lank gelede het ek deel van Woes geword, toe ek ses jaar in die verre Ooste gewoon en gewerk het.  Ek moes daagliks in Engels en Sjinees funksioneer, het  my huistaal ongelooflik baie gemis en na Afrikaanse webblaaie op die internet gesoek. Woes het opgeduik en ek het dadelik ‘n lid geword. Destyds was ons ‘n baie kleiner groepie en Woes het nog sy voete probeer vind, maar dit was soos manna uit die hemel vir my.

Met my terugkeer na Suid-Afrika, het Willem, Lana Lowe en ek ‘n Woes-geleentheid gereël, juis omdat ons en talle ander gebruikers nuuskierig was om mekaar te ontmoet. Dit was wonderlik om ‘n gesig by die woorde te plaas en ons almal het die aand in ons harte bly dra. Elke digter het na die mikrofoon gestap en sy of haar woorde persoonlik, met eie nuanses en gevoel aan die res van ons voorgedra ... hoendervleis. Dit was ongelooflik.

Genoeg van my, haha. Wat ek eintlik wil sê, is dat ons almal soveel vir mekaar en indirek vir onsself  kan beteken indien ons mekaar beter leer ken. 

Woes-groete
KB



Totale stukke publiseer: 358
Totaal kere gelees: 0
Totaal kommentaar: 1,733