Op Woes.co.za onder Woes-Nuus

Vandag in Woorde: EINA!

Die tema vir hierdie week se Vandag in Woorde is EINA. Dis ’n woord wat ouers baie vroeg in hulle babas se lewens gebruik. Dit word sommer ’n naamwoord as mamma sê: ‘kom hier dan soen ek daai EINA beter!’

Dis ’n woord wat dwarsdeur ons lewens met ons hand aan hand loop. As jy sewe is en die tandarts besoek is EINA in jou gedagtes. Of wanneer jy jou knie nerfaf val in die grondpad. Wanneer jy bietjie groter is kom EINA op die rugbyveld voor. Of wanneer jou langeraat verstuit raak deur ’n netbalbal, is ‘EINA f f f verdomp’ op jou lippe. Of daai bloemieng harde krieket- en hokkiebal. Dis waar my sinkplaat maermerries vandaan kom. Of met die rottang in die hoof se kantoor, toe kinders nog kinders was.

Daar is baie EINA’S in die lewe wat geen sigbare letsels of blou kolle laat, waarmee jy later simpatie kan afpleit nie. Die blou kolle van ’n EINA in die hart, siel of gemoed is egter van die heel moeilikste EINA’S om te oorleef. Sommige van daai EINA’S gaan saam met mense kis toe.

Tog is ’n EINA-storie soms van die mees komiese vertellings wat ek al gelees het. Dalk omdat ek dit so werklik in my verbeelding kan voorstel en beleef.

Is jou EINA vandag skreeusnaaks, pynlik of hartverskeurend tragies, vertel ons hierdie week daarvan in jou gedig, rubriek, artikel of liriek. ’n Gorrel is ook reg, vertel net!

Mag daar nie een nuwe EINA in hierdie week opdoem nie.

Boland-groetnis.
Kiekies.


Bron: http://www.woes.co.za/bydrae/woes-nuusstuk/vandag-in-woorde-eina-eina
Kreatiewe bestuurder

Die doel van die Woes Kreatiewe Bestuurder (KB) is om te verseker dat alle gebruikers tuis voel, bestaande standaarde gehandhaaf word en ook om te verseker dat Woes voortdurend beter en meer gebruikersvriendelik word as wat dit reeds is.

Ons moet in gedagte hou dat Woes ‘n bymekaarkomplek van kreatiewe siele is.  Dis die plek waar jy jou mees intieme gedagtes, woorde en drome met ander mense deel. Jy skep kuns met woorde en dis opsigself ‘n edel gawe, iets wat jou onderskei van miljoene ander mense. Dis belangrik dat ons mekaar in daardie opsig respekteer, waardeer en kreatiewe kommentaar op mede-skrywers en -digters se werk lewer.

Jy is deel van Woes omdat jy jou werk met ander wil deel, omdat jy tuis voel en jou werk waardig ag om gedeel te word. Akkolade vir jou! Dis soveel beter as om jou  kosbare werk iewers in die donker laai van jou lessenaar onder ‘n laag stof te bêre, is dit nie?  Laat jou werk asem haal en leef, dis waarvoor Woes daar is!

Kom woon gerus ons Woes Woord & Wyn aande by, waar digters hul gedigte self voordra en hul woorde werklik lewe laat kry! Ons hou van nou af ook boekbekendstellings en wag op voorstelle vanaf jou.

Jajaja, nou wonder julle seker wie hierdie persoon is wat soveel te sê het ... My naam is Carol Williams en ek is al jare lank reeds ‘n Woester in my hart, lyf en skryf.

Lank, lank gelede het ek deel van Woes geword, toe ek ses jaar in die verre Ooste gewoon en gewerk het.  Ek moes daagliks in Engels en Sjinees funksioneer, het  my huistaal ongelooflik baie gemis en na Afrikaanse webblaaie op die internet gesoek. Woes het opgeduik en ek het dadelik ‘n lid geword. Destyds was ons ‘n baie kleiner groepie en Woes het nog sy voete probeer vind, maar dit was soos manna uit die hemel vir my.

Met my terugkeer na Suid-Afrika, het Willem, Lana Lowe en ek ‘n Woes-geleentheid gereël, juis omdat ons en talle ander gebruikers nuuskierig was om mekaar te ontmoet. Dit was wonderlik om ‘n gesig by die woorde te plaas en ons almal het die aand in ons harte bly dra. Elke digter het na die mikrofoon gestap en sy of haar woorde persoonlik, met eie nuanses en gevoel aan die res van ons voorgedra ... hoendervleis. Dit was ongelooflik.

Genoeg van my, haha. Wat ek eintlik wil sê, is dat ons almal soveel vir mekaar en indirek vir onsself  kan beteken indien ons mekaar beter leer ken. 

Woes-groete
KB



Totale stukke publiseer: 358
Totaal kere gelees: 0
Totaal kommentaar: 1,733