Op Woes.co.za onder Woes-Nuus

Vandag in Woorde: Geld

Geld                  deur Kiekies

Geld wat stom is maak reg wat krom is.
Geld is nie belangrik nie, maar dit is darem hoog op die lys, saam met die suurstof wat ek inasem.
Geld koop niks wat regtig waarde het nie.
Geld koop nie geluk nie, maar ek is eerder ongelukkig in ’n BMW as op ’n baaisiekel.
Sonder geld sal ek nêrens kom en niks bereik nie.
Is al hierdie stellings die waarheid?

Wiki sê: geld is enige voorwerp wat aanvaar sal word as betaling vir goedere of dienste gelewer. Is dit al? Of is geld ook ’n wapen van massa vernietiging? ’n Middel tot omkopery en bedrog? Iets waarmee die stem van ’n gewete stom gemaak word?

Sal dit nie beter wees as ons maar weer terug gaan na die ruil skema van ouds nie? Ek bring my boerpampoen en kannetjie bokmelk om te ruil vir jou half dosyn eiers en ’n vars gebakte brood. Oor en uit, g’n rowery of verneuk nie.
Geld veroorsaak dat mense uitmekaarspat, huwelike opbreek, kwaai vriendskappe vir ewig gesmee word en familie mekaar inloop . Daar word mos gesê:

‘Wanneer armoede by die voordeur instap, hardloop liefde by die agterdeur uit.’

Is daar dan niks goed te verkondig oor geld nie?

Is dit nie met geld dat ek vir my kinders se studies betaal het nie?

Help geld dan nie om die honger mense te voed en dakloses te herberg nie?

Is dit nie met geld wat die evangelie verkondig raak nie?

Ek weet sowaar nie. Kom vertel jy vir ons alles wat ons moet weet oor geld.

Wat sou jy gedoen het as jy nie moes werk om geld te verdien nie? Hoe belangrik is geld in jou lewe?

Skryf daar ’n gedig, liriek, verhaal of rubriek. Oor die klank en kleur, stank en geur van geld. Jy sal nou wel nie betaling ontvang nie, maar wel die waardering van jou Woes-vriende.


Bron: http://www.woes.co.za/bydrae/woes-nuusstuk/vandag-in-woorde-geld-geld
Kreatiewe bestuurder

Die doel van die Woes Kreatiewe Bestuurder (KB) is om te verseker dat alle gebruikers tuis voel, bestaande standaarde gehandhaaf word en ook om te verseker dat Woes voortdurend beter en meer gebruikersvriendelik word as wat dit reeds is.

Ons moet in gedagte hou dat Woes ‘n bymekaarkomplek van kreatiewe siele is.  Dis die plek waar jy jou mees intieme gedagtes, woorde en drome met ander mense deel. Jy skep kuns met woorde en dis opsigself ‘n edel gawe, iets wat jou onderskei van miljoene ander mense. Dis belangrik dat ons mekaar in daardie opsig respekteer, waardeer en kreatiewe kommentaar op mede-skrywers en -digters se werk lewer.

Jy is deel van Woes omdat jy jou werk met ander wil deel, omdat jy tuis voel en jou werk waardig ag om gedeel te word. Akkolade vir jou! Dis soveel beter as om jou  kosbare werk iewers in die donker laai van jou lessenaar onder ‘n laag stof te bêre, is dit nie?  Laat jou werk asem haal en leef, dis waarvoor Woes daar is!

Kom woon gerus ons Woes Woord & Wyn aande by, waar digters hul gedigte self voordra en hul woorde werklik lewe laat kry! Ons hou van nou af ook boekbekendstellings en wag op voorstelle vanaf jou.

Jajaja, nou wonder julle seker wie hierdie persoon is wat soveel te sê het ... My naam is Carol Williams en ek is al jare lank reeds ‘n Woester in my hart, lyf en skryf.

Lank, lank gelede het ek deel van Woes geword, toe ek ses jaar in die verre Ooste gewoon en gewerk het.  Ek moes daagliks in Engels en Sjinees funksioneer, het  my huistaal ongelooflik baie gemis en na Afrikaanse webblaaie op die internet gesoek. Woes het opgeduik en ek het dadelik ‘n lid geword. Destyds was ons ‘n baie kleiner groepie en Woes het nog sy voete probeer vind, maar dit was soos manna uit die hemel vir my.

Met my terugkeer na Suid-Afrika, het Willem, Lana Lowe en ek ‘n Woes-geleentheid gereël, juis omdat ons en talle ander gebruikers nuuskierig was om mekaar te ontmoet. Dit was wonderlik om ‘n gesig by die woorde te plaas en ons almal het die aand in ons harte bly dra. Elke digter het na die mikrofoon gestap en sy of haar woorde persoonlik, met eie nuanses en gevoel aan die res van ons voorgedra ... hoendervleis. Dit was ongelooflik.

Genoeg van my, haha. Wat ek eintlik wil sê, is dat ons almal soveel vir mekaar en indirek vir onsself  kan beteken indien ons mekaar beter leer ken. 

Woes-groete
KB



Totale stukke publiseer: 358
Totaal kere gelees: 0
Totaal kommentaar: 1,733