Op Woes.co.za onder Woes-Nuus

Vandag in Woorde: SPREEKKAMER

Hierdie week betree ons die storie-fabriek. Of dalk eerder die Storie-boord of -kelder gevul met ’n magdom stories en gedig-idees, in verskeie kultivars, kleure en geure. Sommige galbitter en ander heuningsoet! Ons betree die SPREEKKAMER. Wie se SPREEKKAMER? Nee, vandag sê ek nie voor nie, jy kan self besluit.

Die huisdokter se SPREEKKAMER? Of die ginekoloog of uroloog s’n? Dalk het jy al besoek afgelê by ’n sielkundige of psigiater se SPREEKKAMER. Of dalk kan jy jou voorstel hoe die pasiënte lyk en waaroor hulle gesels.

Kom ons dink wie het almal ’n SPREEKKAMER. Daar is die veearts, die oogarts, die kardioloog, die onkoloog en die pediater ook. Ek dink mens noem ’n berader se kantoor ook ’n SPREEKKAMER.

Was jy lanklaas by enige spreekkamer? Wel dan is dit hoogtyd dat jy weer ’n slag daar uitkom. Hierdie week lê ek jou die taak op: besoek ’n SPREEKKAMER, met of sonder ’n afspraak. Dan vergader jy inligting en stories, gaan reguit huis toe en skryf dat die spoeg spat en die stof staan.

Oee alla, ek is nou skoon opgewonde oor die bydraes wat ons hierdie week te lese gaan kry! Laat waai, Meraai en roer jou, ou Joe! Ek wag ongeduldig!

Boland-groetnis
Kiekies.


Bron: http://www.woes.co.za/bydrae/woes-nuusstuk/vandag-in-woorde-spreekkamer-spreekkamer
Kreatiewe bestuurder

Die doel van die Woes Kreatiewe Bestuurder (KB) is om te verseker dat alle gebruikers tuis voel, bestaande standaarde gehandhaaf word en ook om te verseker dat Woes voortdurend beter en meer gebruikersvriendelik word as wat dit reeds is.

Ons moet in gedagte hou dat Woes ‘n bymekaarkomplek van kreatiewe siele is.  Dis die plek waar jy jou mees intieme gedagtes, woorde en drome met ander mense deel. Jy skep kuns met woorde en dis opsigself ‘n edel gawe, iets wat jou onderskei van miljoene ander mense. Dis belangrik dat ons mekaar in daardie opsig respekteer, waardeer en kreatiewe kommentaar op mede-skrywers en -digters se werk lewer.

Jy is deel van Woes omdat jy jou werk met ander wil deel, omdat jy tuis voel en jou werk waardig ag om gedeel te word. Akkolade vir jou! Dis soveel beter as om jou  kosbare werk iewers in die donker laai van jou lessenaar onder ‘n laag stof te bêre, is dit nie?  Laat jou werk asem haal en leef, dis waarvoor Woes daar is!

Kom woon gerus ons Woes Woord & Wyn aande by, waar digters hul gedigte self voordra en hul woorde werklik lewe laat kry! Ons hou van nou af ook boekbekendstellings en wag op voorstelle vanaf jou.

Jajaja, nou wonder julle seker wie hierdie persoon is wat soveel te sê het ... My naam is Carol Williams en ek is al jare lank reeds ‘n Woester in my hart, lyf en skryf.

Lank, lank gelede het ek deel van Woes geword, toe ek ses jaar in die verre Ooste gewoon en gewerk het.  Ek moes daagliks in Engels en Sjinees funksioneer, het  my huistaal ongelooflik baie gemis en na Afrikaanse webblaaie op die internet gesoek. Woes het opgeduik en ek het dadelik ‘n lid geword. Destyds was ons ‘n baie kleiner groepie en Woes het nog sy voete probeer vind, maar dit was soos manna uit die hemel vir my.

Met my terugkeer na Suid-Afrika, het Willem, Lana Lowe en ek ‘n Woes-geleentheid gereël, juis omdat ons en talle ander gebruikers nuuskierig was om mekaar te ontmoet. Dit was wonderlik om ‘n gesig by die woorde te plaas en ons almal het die aand in ons harte bly dra. Elke digter het na die mikrofoon gestap en sy of haar woorde persoonlik, met eie nuanses en gevoel aan die res van ons voorgedra ... hoendervleis. Dit was ongelooflik.

Genoeg van my, haha. Wat ek eintlik wil sê, is dat ons almal soveel vir mekaar en indirek vir onsself  kan beteken indien ons mekaar beter leer ken. 

Woes-groete
KB



Totale stukke publiseer: 358
Totaal kere gelees: 0
Totaal kommentaar: 1,733