Op Woes.co.za onder Woes-Nuus

Vandag in Woorde: Verandering

Kiekies se tema vir hierdie week se Vandag in Woorde is ‘VERANDERING’.

Anders. Anders! Alles is so anders. Die hele wêreld het verander.

‘Soos wat?’ vra jy. Wag, ek verduidelik.

Ek luister anderdag na ‘Hoe verklaar jy dit’ op RSG. Daar noem Dave Pepler net ’n paar dinge wat verander het en daarmee gaan my gedagtes op gallop, want ek onthou toe skielik ’n hele klomp dinge wat was, maar vandag nie meer is nie. Of nie meer dieselfde is nie.

Hy noem die volgende:

-      In ons grootword jare het die meeste huise ’n groentetuin en ’n hoenderhok vol skrophoenders gehad.

-      Elke dorp het ten minste drie slagters gehad.

-      Daar was ’n groenteman wat die groente voorsien het wat ons nie self kon kweek nie.

-      Babas was by die huis gebore en ou mense het by die huis gesterf.

-      Later het moeders in die hospitaal geboorte gegee, maar op die natuurlike manier. Vandag is die gange van die hospitaal stil, jy hoor nie meer ’n vrou wat gil tydens geboorte nie, want dit word pynloos afgehandel.

-     
Ek haal ook aan uit ’n skryfsel van ons eie Suikerbrood en Suurvye:
“Is dit, met vandag se tegnologie, werklik nog nodig vir ‘n mishoring? Nie dat ek dit anders sou wou hê nie, want dit is een van die geluide wat maar eie bly aan ons – en seker alle – kusdorpies.”

Verandering is seker goed, solank dit ’n verbetering is.

Ek onthou toe ’n paar dinge wat verander het, wat nie sou pla as dit tog maar dieselfde gebly het nie. Of sou dit?

-      Melk wat in glas bottels by die huis afgelewer word.

-      Die groente lorrie wat straatop en straataf groente verkoop.

-      Oom Doep wat elke Vrydag twee dosyn eiers aflewer. Vars van die plaas af en hier en daar nog ’n spatseltjie mis aan ’n dop.

-      Die bakkery se driewiel waentjie wat vars brood en pasteie van huis tot huis verkoop.

-      Die tannie van Avbob wat elke maand die begrafnisboekie se geld by die huis kom haal.

-      Tupperware se huis partytjies.

-      Die gesin se uitstappie op ’n Sondag om in die winkelvensters te gaan kyk, in ’n dorp waar al die winkels toe is. Gelukkig was die kafee darem oop vir draai roomys.

-      Boeresport op Nuwejaarsdag.

-      Telefoon bestellings vir kruideniersware wat per fiets afgelewer was.

-      ’n Munisipale swembad waar al die kinders van die dorp op ’n Vrydagmiddag bymekaargekom het.

-      Kinders wat in die straat krieket speel onder die straatligte.

-      Piekniek kos op ’n kombers voor die motor by die inry teater. Almal het plat geval vir die Cowboys se koeëls en Indiane se gifpyle.

-      Middagstories op die radio terwyl al die kinders om een tafel huiswerk doen.
-      Versoek programme op die radio.

-      Vrouens wat self brood bak, konfyt kook en vrugte inlê.

-      Buurmense wat oor en weer by ’n draadheining gesels.

-      ’n Roomyskarretjie se klokkie wat in die straat weergalm.

-      Rooi en groen toffie-appels.

-      Tee wat in ’n teepot gemaak word en in ’n fyn porselein koppie met ’n piering bedien word. Deur ’n siffie geskink.

Wat kon maar dieselfde gebly het en wat het genadiglik verander?
Deel met ons. Herinner ons. Help ons onthou of vermaan ons om te vergeet.

Die enigste konstante in die lewe is dat alles een of ander tyd sal verander.


Onthou asseblief om die woord "verandering" in jou titel te gebruik en lekker skryf!

Bron: http://www.woes.co.za/bydrae/woes-nuusstuk/vandag-in-woorde-verandering-verandering
Kreatiewe bestuurder

Die doel van die Woes Kreatiewe Bestuurder (KB) is om te verseker dat alle gebruikers tuis voel, bestaande standaarde gehandhaaf word en ook om te verseker dat Woes voortdurend beter en meer gebruikersvriendelik word as wat dit reeds is.

Ons moet in gedagte hou dat Woes ‘n bymekaarkomplek van kreatiewe siele is.  Dis die plek waar jy jou mees intieme gedagtes, woorde en drome met ander mense deel. Jy skep kuns met woorde en dis opsigself ‘n edel gawe, iets wat jou onderskei van miljoene ander mense. Dis belangrik dat ons mekaar in daardie opsig respekteer, waardeer en kreatiewe kommentaar op mede-skrywers en -digters se werk lewer.

Jy is deel van Woes omdat jy jou werk met ander wil deel, omdat jy tuis voel en jou werk waardig ag om gedeel te word. Akkolade vir jou! Dis soveel beter as om jou  kosbare werk iewers in die donker laai van jou lessenaar onder ‘n laag stof te bêre, is dit nie?  Laat jou werk asem haal en leef, dis waarvoor Woes daar is!

Kom woon gerus ons Woes Woord & Wyn aande by, waar digters hul gedigte self voordra en hul woorde werklik lewe laat kry! Ons hou van nou af ook boekbekendstellings en wag op voorstelle vanaf jou.

Jajaja, nou wonder julle seker wie hierdie persoon is wat soveel te sê het ... My naam is Carol Williams en ek is al jare lank reeds ‘n Woester in my hart, lyf en skryf.

Lank, lank gelede het ek deel van Woes geword, toe ek ses jaar in die verre Ooste gewoon en gewerk het.  Ek moes daagliks in Engels en Sjinees funksioneer, het  my huistaal ongelooflik baie gemis en na Afrikaanse webblaaie op die internet gesoek. Woes het opgeduik en ek het dadelik ‘n lid geword. Destyds was ons ‘n baie kleiner groepie en Woes het nog sy voete probeer vind, maar dit was soos manna uit die hemel vir my.

Met my terugkeer na Suid-Afrika, het Willem, Lana Lowe en ek ‘n Woes-geleentheid gereël, juis omdat ons en talle ander gebruikers nuuskierig was om mekaar te ontmoet. Dit was wonderlik om ‘n gesig by die woorde te plaas en ons almal het die aand in ons harte bly dra. Elke digter het na die mikrofoon gestap en sy of haar woorde persoonlik, met eie nuanses en gevoel aan die res van ons voorgedra ... hoendervleis. Dit was ongelooflik.

Genoeg van my, haha. Wat ek eintlik wil sê, is dat ons almal soveel vir mekaar en indirek vir onsself  kan beteken indien ons mekaar beter leer ken. 

Woes-groete
KB



Totale stukke publiseer: 358
Totaal kere gelees: 0
Totaal kommentaar: 1,733