Titel: As ek sand vashou tussen my hande

Soos ek sand vashou in my hande
en dit tussen my vingers laat deurloop,
so is ek soms hulpeloos in my geloof
en bid en vra ek, sonder om God te loof.

Om met my hande water te skep
en dit deur my vingers te sien wegvloei
So sypel Gods' geleenthede weg
sonder dat ek dit vasgryp.

As ek in eiewaan leef asof God nie bestaan
en dinge op my lewenspad gebeur
wat my "eie ek" laat wankel,
dan eis ek ongeduldige antwoorde van God.

Waarom laat Hý dit met my gebeur?
Eers as ek leeg gehuil sonder emosies
in wanhoop op my knieë neersak,
is ek bereid om te luister.

Wanneer dit stil word  hoor ek die antwoord.
U is ‘n God van liefde en omgee
wat my nie soos sand deur U hande
of soos water doelloos laat wegvloei nie.

U laat my op my knieë neersak
van my eie belangrikheid vergeet.
U bewaar my hart en siel van seerkry
keer dat ek vir ewig brand.

Dankie Heer, U laat my nie my lewe beheer nie,
U vang my sandkorrels van ongeloof
en verander dit in ‘n rots van geloof.

Die lewenswater van geleenthede vang U op
en laat dit soos ‘n donderstorm oor my reën.
Daarom, Jesus, kan ek weer lag,
my geloof nou geanker in my God se krag.

Geskryf deur: Ans Coetzee
© Ans Coetzee 2008