Titel: As jy my nie kom red nie, wie sal ?

Kom haal my
kom haal my hier waar ek vassit
tussen my eie redenasies en
oningevulde spasies van verskonings
wat lankal nie meer sin maak nie

Kom haal my
kom haal my uit hierdie doolhof van vrae
waarop ek te bang is om antwoorde
te hoor
te bang is dat my sal hart wen en my
verstand verloor

Kom haal my
kom haal my by hierdie kruispad wat
kliphard onder my voetsool kraak
met afdraai paaie wat my meer
verward en rigtingloos agterlaat

Kom haal my
kom haal my by hierdie pos-boom
waar vergeelde briewe van skimme
uit my verlede my roof van nou
en van jou hier in my tasbare hede

Kom haal my
kom haal my uit nagmerrie drome
waar die monster en die vrome
elke nag arm druk om besitreg van my siel
waar ek telkemale as slagoffer
voor bloed moet kniel

Kom haal my
kom haal my waar ek stom wag vir
woorde om weer hulle weg na my mond
te vind sodat ek weer sprokies kan vertel
eerder as koors-yl geluide maak op die
nadraai van die wind

Kom haal my
kom haal my uit my verlore status
meld my aan as gevind
dat ek weer soos 'n vrou kan leer liefhê
nie meer hoef te vrees soos 'n kind.


© 2010 Almarie Truter