Titel: Betowering

My geluk kry net nie end nie
met jou as maat, hand aan hand
Uiteindelik voel ek gelukkig, gevul,
tevrede, hier in jou berge-land

Kerslig-ete, ‘n glas sjerrie
‘n opregte glimlag, jy het my bekoor
Daar tussen berge het ek waarlik
my hart begin verloor

Baie later lê ons styf teen mekaar vas
ons praat oor is, kon wees en wat was
Ons het drome gefluister die hele nag,
gesels en luister tot die volgende dag

Saam beleef ons deinings van geluk
liefdesgolwe wat aan hartsnare pluk
Hande soekend oor berge deur valleie
vanaf nekke, langs die sye, tussen dye

Maanligstrepie wat die kamer indring
‘n koor paddatjies wat buite begin sing
die sterre in jou oë, die more se grou
jou wil ek vir altyd, in my arms toevou.