my hand se inkpad stap oor papier
ek soek jou verskilmaak hande hier

almal se hande verskillend tog só uniek
elke hand om iets besonders te bied

kom ons boei ons hande in ‘n liefdesketting saam
‘n nuwe weg vir harmonie te baan

ook baba handjies met dimpels onskuldig en klein
selfs oumens hande vol skete en pyn

bouershande vol sement wat stene kan lê
hande wat klanke vir die dowes sê

hande, bakhand smekend en leeg
ook hande wat kan knie in deeg

hande taai soos ‘n riem
om saad in ons grond te laat ontkiem

soekend vir hande tussen pen en papier;
growwe hande van ‘n vakman wat kan saag en skuur

waar kan ek kry ‘n skildershand met reënboog palet
moedershande wat op haar gesin se waardes let

ek soek hande van die arts wat sny
maar ook outehuis hande wat truie kan brei

dit maak nie saak watter hande jy het
vir jou handafdruk is daar nog ‘n plek

bring jou gee-hande om gewillig te wees
om ‘n wêreld te skep met ‘n nuwe gees