Ek volg jou spoor
deur die vaart van verbeelding
oor knobbelstrate
verby kastele en katedrale
deur tyd
verdwaal in Middeleeuse gange
deur paleise en tuine
waar verlore liefdes en verlange
in vergete wêrelde rus
en ek knus opgekrul
teen ʼn ongenadige werklikheid
waar niemand my kan kry nie
my ken of onthou nie
waar ridders en prinse op wit perde
na ʼn skoonlief soek
en jou skrywershande my lei
waar my hart kan vertoef
aan die anderkant
van vergeelde bladsye
en inkswart woorde
van ʼn boek.

© C. Potgieter 2013-04-13