Ek skryf vir jou met skulpe op die see se strand
onderstreep dit liefderyk met die palm van hand
trek ’n hoepelsirkel daarom met sagte seewier
verlig dit rooksein-helder met droë palmtakvuur

Ek verf vir jou harte met tortelduif se veer
teen die soetdoringstam wat in bosveld staan
gebruik ook sy dorings om ’n pyl deur te trek
met boomgom plak ek stewig ons foto onderaan

Ek spel jou naam met rivier se spoelklippe
grassade vleg perfek-gekante vierkantraam
tevrede tree ek terug met ’n hoorbare sug
as jou naam vibreer, repeteer op my lippe

Ek skets met my vinger teen jou hart se muur
in liefdeskodes slegs aan ons twee bekend
wanneer jy dit dan binnekort, blitsig ontrafel
bring self die antwoord na my eie hartstafel