Titel: Maranatha

soos Adam uit die eerste tuin
is dié Seun uit Getsemane
en God’s hand gepluk
om langs die Via Dolorosa
sy eie weg van smart te stap

wyl die Judaskus nog warm
op een wangbeen brand
en ‘n haan drie maal die klank
van verloëning en verraad uitkraai
bloedreën die kleur van pyn
brand minagting in ‘n doringkroon
gésel ‘n soldaat met kats
en spotwoorde wat vermaak en hoon
om Liefde te verskeur
breek die Brood
en vryvloei Sy Wyn
oor rug en lende en Sy skoot
om in die stof onder Sy voete
kragteloos uit te loop
want Pontius Pilatus het
sy hande afgespoel
aan Een wat voete was

en later, toe mý oogbalk
die breekhout word waaraan Hy hang
en kruisheuwel en die tempel
in diep duister staan
skeur die skeidsgordyn in twee
want Hy het vir ‘n laaste keer
die ánder wang gedraai