Ek hoor die geroep
Dit raak meer en meer angstig
Dit bereik ‘n piek van absolute vernedering
Dit verwoes die kamers…

Kamers van die hart…
Kamers van die siel…
Kamers van die gewete…
God is uiteindelik net deel van die verlede…

Die vuil en onnodige gedagtes
Dit teister my gedurende my slaap
Dit onttrek my wil vir samesyn
Dit maak dat self liefde- en respek net verdwyn…

Die drange verhoog…
Genoeg is skielik te min…
My tyd raak verstrooid…
Met verdwaalde en verwronge intensiteit… tot niks…

Elke been skreeu uit: “Jou SWAKKELING”
Elke bors snou toe: “Jou NIKSWERD”
Elke kyk sê: “Ons het jou”
Jesus se sagte stemmetjie pleit: “m…o…e…n…i…e…”

My brein is beknop
Die drange skreeu tot uitlating
Die verdwaaldheid van die siel
Lê in die sloot; verpletter en verniel…

Daar is ‘n blik op hoop…
Die liggie wil-wil flikker…
Die ingewing van wilskrag
Die gebrokenheid van nog ‘n oomblik

My emosionele band word nouer en nouer
Die brein kapasiteit kleiner en kleiner
My geloof ly honger
Die verslawentheid kan net nie wag tot sonsonder…

My opvoeding kwyn weg
Pornografie is my enigste uitweg
Ek smag na die gevoel van tevredenheid
“Hardcore” word my enigste beleid

Die leë siel brand in die son
Die laaste bietjie moraliteit droog uit
Die laaste hoop gryntjie
Verander in ‘n verouderde rosyntjie

Waar is my God?
Waar is getrouheid teenoor die Liefdes gebod?
Here my God, gryp my hand…
Draai my toe in U verband…

Ek kyk terug en sien geen spore…
Net een bebloede sleep streep
Ek kruip en reik uit na God se voet
‘n Baie sagte stemmetjie sê: “Hou moed!”

Here my God;
Les my dors…
Vul my siel…
Heg weer my soeke, sodat ek net voor U sal kniel…

Maak my vet met U liefde
Laat ek swaar loop onder al U seëninge
Laat ek gebukkend staan
En besef die soeke na pornografie sal nooit weer toeslaan…

“Hou moed my kind,
geen prentjie sal jou ooit weer verslind.
Kyk na jouself deur My liefde,
en besef Ek beheer jou lewe op alle gebiede!”

-Die Here jou God