wees lief vir my van ver af
waar die krakies nie so
duidelik
soos die lagplooitjies wys nie
en trane soos 'n glinster
in die oog lyk

wees lief vir my van ver
sodat die
val
van my hart
nie 'n hoeweslag in jou ore
word nie
of die eggo van my snikke
donderweer op jou horisonne
bring nie

lief my van ver
sodat ek nie sien
hoe infeksie
jou uitkyk op die lewe
soos 'n bedseer laat
vrot het nie

hou my ver
sodat my groeiende liefde
weeskind word
en later...
dalk, as ek gelukkig is
soos kanker
sy laat sel
laat sterf.