Sou dit nog dieselfde wees
volgende Augustus
as die winterson weer
so op my rug kom ry
sou ek my pen steeds
met selfvertroue kan optel
om soos altyd
denke en dade neer te skribbel
sou ek dan nog genot daaruit put
om die lewe in swart op wit uit te lê
sou vriende steeds met skitter oë lag
en met hul sonskyn siele
die lang winterkou verdryf
sou ek volgende Augustus
nóg tuis kon voel in hierdie vel?