As ons die wolke so aanskou;
vertel hul stories wat ontvou
Deur watter bril jy kyk;
laat die wolke vir jou anders lyk

n Wolkie op die horison;
verwagtend vir iets wat kom
Is dit goed of is dit kwaad?
iets wat ek aan jouself oor sal laat

Helder witte wolke teen die bloue lig;
alles in die skepping het n plig
Miskien is hierdie wolk nie vir jou;
maar om skaduwee vir ander te hou

Vir miswolke moet jy nie skrik;
kan verdwyn in n oog se knip
Hul kan jou ook verras;
nou-nou reën dat die water plas

Donker onweerswolke pak eers saam;
onheilspellend soos hul naam
Swaar dra hulle aan die reën;
party sal ween, vir ander tot seën

Weerligstrale wat deur die donker wolke blits;
n donderstorm ontketen in ‘n kits
Na die storm is dit stil;
stil, om te luister na Sy wil

As jy die silver randjie om die donker wolke sien;
weet dis die son daar agter wat dit voorsien
As die wolk verdwyn;
sal die son weer helder in jou lewe skyn

As die wolke dan oor jou gaan;
is dit die weg wat hul maar baan
Ons kan hulle nie terug hou of bestel;
hul is daar op die Skepper se bevel

Hoe jy die lewenswolke skilder met jou kwas;
daar is genoeg kleure wat vir jou wolk sal pas...