Waarom...Hoekom deur Jan v.d. Merwe | Bydraes | Woes - Kreatiewe platform vir Afrikaans

Ek weet werklik nie waar ek hierdie skryfsel moet plaas nie. Gedig, Gorrel, Rubriek, ek weet nie regtig nie. Ek wil dig, ek wil net vertel.
Dig en vertel deurmekaar. Lees maar soos dit kom.

Vandag, 46 jaar later, dink ek weer aan daardie verskriklike gebeure, in die kombuis van die huis waar ons destyds gewoon het.
Sommige jare vergeet ek om die een of ander rede, maar meer gereeld as wat ek graag sal wil, onthou ek. Wens ek kon vir altyd vergeet, maar nee, ek bly teen wil en dank, met afgryse onthou.
Sal ek dit ooit kan vergeet
hoekom ek van tyd tot tyd onthou
sal net God alleen weet.
Hoekom het jy my met so 'n passie gehaat?
Jy was my Ouboet
al wat ek wou hê...
aanvaar my as jou kleinboet en maat.
Was dit te veel gevra
te veel vir jou om te verdra?
Hoekom Ouboet
Hoekom het jy my so verskriklik gehaat?
Wat het ek verkeerd gedoen...
of liewer
wat meer moes ek doen
sodat ons in vrede as broers
kon saamleef
en jy met die gedagte kon versoen??

Hoekom het jy my so verskriklik gehaat???

Sal ek ooit daardie dag vergeet
Here, as ek net die dryfveer agter jou optrede kon weet!!

Ek kom van die skool
slaan gou iets aan mekaar om te eet
Meteens staan jy daar
grynslag
jou gesig van haat
wreed vertrek.

In jou hand
jou Army .303 geweer

"Jou klein gemors
uit hierdie kombuis
stap jy lewend, nie weer!"

Verskrik kyk ek op
sien hoe jy die wapen lig
sekuur op my rig
Sien ek vandag nog
hoe jou vinger om die sneller krul
Met die vreeslikste haat is jy vervul.

Steeds hoor ek daardie knal
presies dieselfde oomblik
wat ek desperaat
van die stoel af val.

Sien ek steeds die gat in die muur
bedoel vir my kop
daar waar jy gemik het
so presies
en so sekuur.

Hoekom Ouboet
hoekom het jy my so verskriklik gehaat??

Vir baie jare reeds
is jy nie meer
maar die vrae
hoekom en waarom
kan ek steeds nie keer.

Hoekom Ouboet?
Hoekom??

Kommentaar

Ans Botha

Hoekom

As dit sal help Jan. In my eie huis (ek het vier kinders) (en ek kom uit 'n huis met vier kinders) het dieselfde haat tussen die ouer kinders gele as teenoor die jongste. Die jongste een van die eerst twee kinders of as daar net twee kinders is was die ouer een eers dinge voor gedoen en gegee en soms so hier en daar 'n bedrefie bygesit. Nou kom die tweede of jongste een, nou doen die ouers vir daardie kind presies dieselfde as wat hulle vir die ouer kind gedoen het op daardie ouderdom. As klein baba is het die kind meer aandag nodig, daar is nie vir mamma tyd om meer die aandag toe te pas op die ouer kind as voorheen nie, dit maak haar nie minder lief vir die ouer kind nie, maar die kind sien dit as vewerping. En soos die kind groter word, so verander die kleintjie se behoeftes en mamma pas dit aan (net soos vir die ouer kind wat daardie ouderdom was eens op 'n tyd).
Nou Jan, kry mens verskillende tipe mense. Jy het dit al self beleef in jou lewe. Die een persoon het 'n gemaklike geaardheid die ander 'n moeiliker geaardheid.
Jou broer se geaardheid as ek reg kon raai sou ek se, het maklik verwerp gevoel. En ongelukkig was jy die kleinboet op daardie stadium.
Net bly jy het van die stoel afgeval! En dit Jan was die Here se wil gewees.

E-pos

4 jaar 9 maande 2 weke 2 dae 16 ure oud

Koekekranka

Waarom...Hoekom

Meskien moet ons maar die nagmerries van gister verruil vir die drome van more en vandag maar net geniet wat ons Hemelse Vader ons skenk..

E-pos

4 jaar 9 maande 2 weke 2 dae 21 ure oud

Arnold

Waarom...Hoekom

Die weermag het baie mense se lewens verpletter ten koste vir die gewome mens in sy samelewing en ten voordeel van die rykman se behoeftes.

E-pos

4 jaar 9 maande 2 weke 3 dae 15 ure oud

Corina Becker

Jan

Dit is wat trauma met 'n mens doen. Hulle noem dit vandag Post Taumatiese Stres Sindroom. Daar is behandeling ook daarvoor ~ maar ek glo jy weet dit. Ennnn vlug maar net weer-en-weer in die Here, jou Skuilplek, in. Dit is trouens Hy wat die koeël veby laat trek het. Net soos met Dawid en koning Saul . . .

E-pos

4 jaar 9 maande 2 weke 3 dae 15 ure oud

Adriaan J

Waarom

Jan, geen mens sal so iets ooit vergeet nie. Dit moes vreesaanjaend in die ergste graad gewees het. Ek weet nie wat om vir jou te sê nie, behalwe miskien om God te dank dat jy lewe, en te vra dat die Vader hom sal vergewe vir dit wat hy aan jou gedoen het. En dan vergewe jy hom ook.

E-pos

4 jaar 9 maande 2 weke 3 dae 16 ure oud

Anze Bezuidenhout

waarom

sjoe hierdie is eina.. dalk is dit beter om die vrae te begrawe en net die mooi te onthou, te berus by dit wat ons in elk geval nie kan verander nie?

E-pos

4 jaar 9 maande 2 weke 3 dae 21 ure oud

Viooltjie

Eina

Dis darem baie vreeslik, Jan. Mens sal seker altyd wonder oor so iets. Ek hoop jy vergeet dit sommer heeltemal, want dis lank reeds verby. Goed geskryf :-)

E-pos

4 jaar 9 maande 2 weke 4 dae 1 uur oud