soos die skemer na die aandster soek
en 'n hen rondom haar kuikens kloek

soos die maan hom tot die nag bekeer
en die môre-uur die dag begeer

soos die bergpiek op 'n sonstraal wag
en die blou lug na 'n arend smag

soos Karoo-bos na die reĕn verlang
en 'n vinknes aan 'n tak moet hang

soos 'n lelie langs 'n dam wil wit
en 'n dassie teen 'n krans wil sit

soos kinders wat graag kaalvoet loop
waar 'n leivoor nog op water hoop

soos branders na die kus toe neig
en pêrels aan 'n snoer wil ryg

soos rivier-monde die see wil vind
en die lafenis...in 'n somerwind

soos 'n berggans na 'n Wuppertal
en 'n plekkie waar sy veer kan val

soos Namakwa-daisies van die lente hou
só groot...is my gemis
aan jou