Ek is drie maande terug die geleentheid gegun om deel te wees van ons skool se splinternuwe 'uit die boks' kultuur groep. Eers het ek daarin getwyfel, maar omdat slegs 'n groep van sewentien uit 'n skool van meer as een duisend kinders gekies is, moet ek net uithaal en wys wat ek kan bied!

Om deel van die groep te wees behels verskillende aktiwiteite en jy kan nie slegs fokus op een "genre" nie, jy moet jou vlerke wyd oopsprei en dinge doen waarvan jy niks weet nie. My onderwyser, vir almal wat Amalia gekyk het, sy was Hestertjie, is baie interessant en vang mens altyd onverwags met iets! Ons eerste uitstappie was na Monte Casino om hierdie toneel produksie deur Pieter Toerien te gaan beskou. In 'n volbespreekte ouditorium begin hierdie sprokiesverhaal!

Dit was oorspronklik verby! Die dekor, musiek en selfs kostuums was kleurvol en ek was te bang om my oe te knip, bang ek mis iets! Die "special effects" was iets buite hierdie wereld!

Die verhaal het begin met Belle (Beauty) wat in 'n markplein haar boeke wat sy so mal is om te lees te gaan teruggee. Om 'n lang storie te verkort, sy en Beast het mekaar ontmoet deur haar bejaarde pa. Beast was 'n karakter wat net homself belangrik ag in sy lewe en geen gevoel het nie! Die skoonheid het vir hom gewys dat gevoel gevoel kan word deur liefde, omgee en vriendskap!

Ek beveel almal aan om hierdie asemrowende stuk te gaan oordeel! Beauty and the Beast, 'n nag wat vir altyd onthou sal word, 'n nag wat 'n verskil gemaak het, 'n verhoog produksie uniek in sy klas! Wel Gedaan!