Dit is 2027 en die wêreld staan op die rand van ‘n totale ineenstorting. Natuurlike hulpbronne is so te sê uitgeput en oral heers chaos en anargie. Die laaste baba is 19 jaar gelede gebore en niemand weet hoekom die vrouens almal onvrugbaar is nie. Slegs Engeland kry dit reg om vas te klou aan reg en geregtigheid deur middel van 'n totalitêre staat te handhaaf. Theo (Clive Owen) word deur sy eertydse vrou (Julianne Moore) genader om haar ondergrondse beweging te help om 'n meisie by die kus te kry. Op pad vind hy uit dat sy swanger is. Een groep wil haar baba gebruik om 'n rewolusie te begin en 'n ander wil help om hulle na 'n beter blyplek te smokkel. Hierdie is seker een van die beste flieks wat tot dusver hierdie jaar gedraai het. Onthou net, hierdie fliek is nie vir lamsakke nie. Dit is 'n helse blik op 'n wêreld wat baie moontlik net om die draai lê....