John Connor (Christian Bale), is eindelik die volwasse man wat die menslike verset teen die masjiene moet lei. Ongelukkig is dit nie die toekoms wat hy gedink het dit sou wees nie en moet hy ook besluit of die vreemdeling in hulle midde ’n T-600-sluipmoordenaar is, of ’n gewone mens met geheueverlies. Christian Bale het glo nie al sy varkies op hok nie. Of dit waar is of nie, weet ek nie van ’n ander akteur wat hierdie rol so oortuigend sou kon vertolk nie. Hy is een van die min akteurs wat die vermoë het om hom heeltemal te vereenselwig met die karakter wat hy vertolk. Regisseur McG, is een van ’n handjievol wat werklik aksieflieks verstaan en juis daarom is hierdie nie net nog ’n opvolgfliek nie. Na meer as twintig jaar is die T-600 nog steeds skrikwekkend en die reeks nog nie oud nie.