Rubrieke

Bladsye:
Deel hierdie werkstuk met jou Facebook vriende

Beste Buddie



Soos al die ander ruspes het jy my stadig-maar-seker oortuig dat jy my gekies het omdat my takke die laagste hang en my blare die mooiste lyk. Met jou mooi woorde het jy my laat verstaan dat jy geen ander boom ooit sal wil hê om in te skuil nie, en jou glimlag het vir my die belofte ingehou van seisoene wat getrotseer kan word omdat ek geselskap het.



Ek het jou stadig maar seker laat naderkom en jou versigtig oor die skurwe stam laat kruip omdat ek nie wou gehad het dat my buitekant jou moet seermaak nie. Dit is immers ‘n buitekant wat ek gekweek het om my te beskerm teen indringers. Ek het probeer om vir jou al die mooi gedraaide takke te wys en jy het selfs ‘n paar van my letsels gesien. Ek het jou later tussen die blare laat ingaan. Ek het jou sien groei en ek het nie omgegee dat jy van my af voed nie. Selfs dit was ok.



Jy het egter al die blare vol gate geëet en selfs ‘n paar ander genooi om saam te kom geniet wat in elk geval nie joune was om te deel nie. Nadat julle magies trommeldik was het jy jou saam met jou tjommies in kokonne toegespin. Toe-toe-toe! Jy het my aan flarde gelos met die skrale troos dat ek dalk sal sien as jy eendag ‘n mooi kreatuur word wat deur versamelaars gesoek word.



Ek het daardie dag beleef. Vir ‘n rukkie was jy vir my so mooi dat ek saam met jou bly was en al jou mooi kleure raakgesien het sonder om eers te dink aan al die blare wat vol gate was. Jy was mooi en ek het gehelp om jou so te kry. Ek het dit geniet om te sien hoe jy die voorwerp van almal se begeerte geword het, en as iemand jou wou vang en seermaak, het ek vir jou skuiling gebied en my stam skurf gehou vir die indringers. Jy was baie by my en ek het spesiaal gevoel.



Jy het nie lank gebly nie; maar jy het nie gegaan voordat jy honderde-duisende eiertjies gelê het en gesorg het dat my toekoms vol gaan wees van jou voortbrengsels nie. Vir die res van my bestaan sal ek altyd gekonfronteer word met ruspes wat die belofte van geselskap en skoonheid inhou en wat teer om daar te kom.



Ons twee se paaie sal verskillend loop van nou af. Jy sal saam met jou skoenlapper-buddies rond vlieg en almal se aandag trek en almal se asems wegslaan. Rondom jou sal daar egter boorde vol bome met gate in hulle blare staan. En hulle sal almal suurstof bly verskaf met hulle stukkende blare. Ek sal een van hulle wees en bly wonder oor my stam en my takke en watter een van die twee jou gegrief het. Ek sal hoop dat jy onthou ‘n skoenlapper op sy eis is maar redelik swakkerig en kry gou seer.



Ek sou jou nog steeds eerder tussen my takke wou gehad het as op die voorkant van ‘n motor se ruit waar daar van jou skoonheid net ‘n spatsel oorgebly het.



Pas jouself mooi op!

- Boompie



Spaar Geld op Versekering

Lucky Lottos

Kommentaar

Auf wiedersehen
Op die laaste dag van ons tydrekening:
Dankie vir hierdie besonders mooi ,gedig in prosavorm.'
Groetnis vanToom
4 jaar 1 maand 3 weke 4 dae 9 ure oud


Ontsettend mooi beeldspraak. 'n Brief waarmee 'n mens kan identifiseer en wat die hart raak. Pragtig!
10 jaar 5 maande 5 dae 20 ure oud


Dis so goed geskryf. Elke woord wat so mooi pas in die geheel.
10 jaar 5 maande 5 dae 23 ure oud


Ek het elke woord in my diepste wese ervaar
Dit is verskriklik mooi, eg en met soveel liefde en deernis geskryf.

Dankie dat jy hierdie gedig na woes toe gebring het, en baie dankie Rudie Coetzer dat jy dit vir my aangestuur het.
10 jaar 5 maande 6 dae 10 ure oud


Hou hiervan.EN dis baie oorspronklik.Oed geskryf.
10 jaar 5 maande 6 dae 11 ure oud


Beste buddie
Baie dankie vir jou skrywe. Ek het nodig gehad om dit te lees vannaand.Ek is meestal meer bymekaar en ligtelik in my skrywe maar jy het my in 'n emosionele wrak verander en ek kan my trane nie keer nie. Dankie daarvoor! Ek bedoel dit opreg!
Boetietjie
10 jaar 6 maande 5 dae 5 ure oud


Mal oor jou styl!
10 jaar 8 maande 2 weke 1 dag 20 ure oud


Goeie versinnebeelding
Ek is jammer dat ek nou eers hierdie stukkie raak gelees het, maar ek is verheug dat ek dit wel gedoen het. Dit is voorwaar goed gedoen. Ek lig my hoed vir jou.
PM
11 jaar 10 maande 4 weke 21 ure oud


Boompie
Gelukkig het elke boom wortels wat diep onder die aarde vasgenaal is en geen wind sal dit omwaai nie.
13 jaar 8 maande 6 dae 5 ure oud



Nuutste werk ingestuur binne die afgelope 7 dae


    Geborg deur :

    Van ons ander lede

    Kroniek van die Suid-Afrikanse Weermag (1912 - 1994)

    deur Francis Gillieron

    Beskryf die geskiedenis van die ou SA Weermag vanaf sy stigting in 1912 tot sy ontbinding in 1994. Die SA Weermag se voorgeskiedenis word ook weergegee.



    picture

    Kompetisies

    Kyk watse opwindende kompetisies tans beskikbaar is

    picture

    Nuusbriewe

    Registreer nou om nuusbriewe van Woes te ontvang

    picture

    Winkel

    Woes skrywers wat self publiseer se boeke is in die winkel beskikbaar