Titel: T.e.a.

Ek is tans besig om stories uit die geskiedenis van Colesberg en sy interessante mense na te vors met die gedagte om ’n boek daaroor saam te stel.

Gedurende die Junie-vakansie ek by die plaaslike museum in met die doel om meer inligting oor die skermutselings gedurende die Anglo-Boereoorlog te bekom. Op die ou einde het ek meer tyd by die “Struggle” -geskiedenis spandeer en ook in gesprek met die huidige Xhosa-kurator en sy kleurling ontvangsdame spandeer.

As medewerker van die versoeningsorganisasie Mercy Ministries SA het ek geleer om dieper as die oppervlak te lees en te luister. My lewensdoel as Christen, so glo en ervaar ek, is om binne my invloedsfeer Christene van oor die hele spektrum te help om mekaar se optredes beter te verstaan, ten einde ’n manier tot ware samewerking te kry, sonder om ons kultuur-eie prys te gee. By kultuur verstaan ek dit wat goed en mooi en uniek aan elke mensegroep oorbly nadat dit wat boos is, geëlimineer is. Dit gaan ook vir my oor die erfenis wat ons as Suid-Afrikaanse Christene vir die volgende geslag nalaat.

Colesberg se gemeenskap is myns insiens ’n prototipe van die mensdom wat in Suid-Afrika woon. Alle paaie lei verby Colesberg. Wat ook al in die res van Suid-Afrika gebeur het, het ook sy inslag in hierdie dorpie gehad: In die 18de eeu is die Boesmans hier gejag ... later is hulle gekersten; die Grensoorloë het die Xhosas hierheen gedryf; die Voortrekkers het hier verby beweeg en ook later vanuit Natal hulle kinders hier kom doop; verskeie skermutselings het tydens die Anglo-Boereoorlog hier plaasgevind; ook in die Struggle-tyd het leiers vanuit Colesberg ’n prominente rol gespeel.

Hoewel ek oorhoofs met ’n Christelike inslag skryf, probeer ek die verhale so objektief moontlik weergee. Daarby bedoel ek dat ek in die betrokke persoon of groep se skoene probeer klim en spesifieke gebeure vanuit hulle perspektief skryf.

Die stories wat oor Colesberg gaan verskyn, sal met die letters T.e.a. (Toverkop et al) voorafgegaan word.

Foto Galery