Die tema vir ‘Vandag in Woorde’ is hierdie week ‘GOUD’. Ons hele lewe is deurspek en vervleg met spikkels en strepe van goud.

Goud is:

-      Die hoogste toekenning wat ’n Olimpiese atleet kan ontvang vir enige item waaraan hy of sy sal deelneem.
-      Die kleur van die oggendstond wanneer die eerste strale oor die oosterkim verskyn.
-      Die kleur van die sonsondergang wanneer die laaste strale oor die westerkim verdwyn.
-      Die kleur van stroop-slierte en heuningdruppels.
-      Die glinstering in ’n blonde kind se hare wat op die strand of in die park speel.
-      Die metaal waarvan die pant gemaak is wat twee lewensmaats in die eg verbind.
-      Die rede hoekom hordes in ’n stormloop na Pelgrimsrus gestroom het.
-      Die rede hoekom werkers tot vandag toe nog soveel as 4 km die donker warm aarde inkruip om hulle daaglikse brood te verdien.
-      Die metaal waarmee die Arabiere hulle moskees se pilare en mure bedek.
-      Selfs eetbaar as versiering op fyngebak.
-      Die kleur van varsgebakte soetkoekies, brood en beskuit, pas uit die oond.

Wanneer ek aan gesegdes dink, onthou ek:

Al dra ’n aap ’n goue ring, bly hy steeds ’n lelike ding.

Onthou asseblief om die woord “goud” in jou titel te gebruik en gaan vir GOUD!