Titel: Woes toekennings

---

Nadat ek weer gekyk het hoe wyd die Woesters versprei lê in die wêreld het ek besluit dat toekennings in die vorm van sertifikate beter sal werk as trofee.

Die toekennings gaan soos volg werk:

• Hierdie week kan nominasies vir elke kategorie ingestuur word.
• Ek gaan dan die top 10 nominasies uit elke kategorie kies. Met ander woorde, die 10 name wat die meeste vir elke kategorie nomineer word.
• Volgende week sal julle aanlyn kan stem vir elke kategorie. Die sisteem laat elke persoon net toe om eenkeer te stem.
• Die week daarna sal die wenners aangekondig word.
• Daar gaan ‘n paar kategorieë wees waar die wenners deur Woes self aangewys gaan word. Dit is kategorieë soos meeste gelees, meeste kommentaar gelewer ens.

Die kategorieë waarop gestem kan word is soos volg:

Woest alleen

Die Woester wat die verste of mees afgeleë van Suid Afrika is wat gereeld ‘n bydrae lewer.

Doring in my vlees

Die skrywer wat tonge die meeste laat klap. Iemand wat regtig dinge onder die Woes skrywers warm maak. Amper soos die neef waarvan die familie nie praat nie maar almal weet van hom.

Uitblinker

Die skrywer met die meeste potensiaal. Iemand wat in jou opinie ‘n goeie kans staan om wel publiseer te word.

Kontroversie

Die skrywers wat die mees kontroversiële werk instuur.

Skaterlag

Die skrywer wat beste humor bydraes lewer.

Sagste hart

Die skrywer wat die beste liefdesgedigte skryf.

Rambo

Die skrywer wat onder baie moeilike omstandighede steeds ‘n gereelde bydrae lewer. ‘n Kort motivering van die situasie moet ook saam ingestuur word.
Kampvegter

‘n Skrywer wat jy van weet wat regtig uit hulle pad gaan om almal van Woes bewus te maak. Iemand wat ‘n Woes T-hemp onder hulle werksklere dra net ingeval daar ‘n letterkundige noodgeval iewers opduik.

Moeder van ‘n duisend

‘n Vroue skrywer wat haarself ontferm oor nuwe skrywers en regtig ander skrywers probeer help om op hulle voete te kom en hulle talent te beoefen.

Vader van vele

‘n Manlike skrywer wat homself ontferm oor nuwe skrywers en regtig ander skrywers probeer help om op hulle voete te kom en hulle talent te beoefen.

As jy iemand wil nomineer, “copy en paste” die kategorieë inligting in ‘n epos en sit jou nominasies by elke kategorie en stuur die epos na web@woes.co.za