Ja, jy het reg gelees! Verander al die dorpe se name, maak die Bokke almal Proteas.
Dit is altyd interessant om te sien hoe die politici elke dorp en stad se naam wil verander en hoe ons nasie daarteen veg. Hulle kon nog nie een nuwe stad byvoeg nie en daarom voel hulle dat hulle iets bereik as hulle die bestaande stede se name verander. Siestog!
Tog stem ek met hulle saam. Ons stede en dorpe word almal opgefoeter. Dit is gevaarlik en vuil. Ons skole word onherkenbaar en baie skole met ou trotse tradisies verval. Oud-leerlinge is skaam om te laat weet dat hulle leerders van die betrokke skole was. So ja, verander die name van die plekke! Dit is nie meer wat dit was nie.
Pretoria is nie meer die Jakarandastad wat dit was toe ons Tukkies eksamentyd onder die Jakarandas geloop en geloop het nie. Dit is vuil, gevaarlik en niks om op trots te wees nie, so ja, verander die naam totdat die stad se eertydse glorie herstel is.
Ons het tog die stede gebou, ons kan dit weer bou. Maar op die huidige gemors kan ons nie trots wees nie. Hoop net hulle kan al die kaarte betyds vervang, dat ons nie in 'n Babelse verwarring gaan wees nie. Ha, Ha!
Waarom ons so geveg het om die Springbok vir die rugby te behou, weet ek ook nie. Maak hulle almal Proteas. Hoe kan 'n mens van Frik en die res verwag om trots te wees dat hulle Bokke was, as dit nou in sommige se onbekwaamde hande geplaas word om die Bok se skop te bewaak? Hoe is mens trots op jouself, as jy weet dat 'n politieke skoen jou bo-oor ander bekwame mense geskop het? So ja, maak die Bokke almal Proteas. Bring die Bok eers weer terug as ons op hom trots kan wees.
Nooit gedink dat ek dit sou dink nie, maar ek word al meer en meer 'n All Black-ondersteuner. Daar is nou manne wat trots op hulle span is en die wa deur die sloot kan trek.
(348 woorde)
|
Druk hierdie happie
