Projekte:

Projek: WOES Skryf WOES 2015

Kere gelees: 278308 | Totale Kommentare: 8189

Elke Woesteling skryf om een van die volgende redes:
- Dis jou passie
- Jy het iets om vir ander te sê
- Skryf is jou terapie en ontlading

Daar is skrywers wat sê hulle skryf nie vir ’n leser nie. Maar, en dis ’n groot maar, die meeste van ons wil dit wat ons skryf met ’n leser, en hopelik baie lesers, deel.
Om hier op Woes te skryf is maar net die begin. Woes is jou een-snaar-blik-kitaar.

Waar jy oefen en leer en faal en weer probeer. Dis die kommentaar en aanmoediging van die ander Woestelinge, wat jou motiveer om nog te skryf en al beter te raak.

Dan kom daar ’n dag wat jy weet ... jy weet jy het nou genoeg geskryf om ’n boek te publiseer. Hetsy in ’n gewone boekrak-boek of ’n e-boek. Elke skrywer pak nie altyd die bul by die horings nie, om verskeie redes:

Jy dink nie jou werk is goed genoeg nie
Jy kom net nie klaar nie
Die motivering is weg
Jy het geen idee hoe om te publiseer nie
Jy weet nie waar om te begin nie

Met WOES Skryf WOES kan jy in 2015 jou eerste boek publiseer! 


Projek: FINALE PROJEK OP WOES – AFSKEID (2016-01-06 tot 2016-02-07)

Kere gelees: 11367 | Totale Kommentare: 357

Aangesien elkeen seker al die vreeslike hartseer nuus gekry het dat WOES op 14 Februarie 2016 sy deure op die web sluit het ek dit goed gedink om ons laaste projek  weer vir die hele maand te loots sodat elkeen wat wil kan afskeid neem van 15 jaar se samesyn. Met hierdie laaste projek is daar geen beperkings op inskrywings nie. Die projek sluit 2016-02-07 en daar sal nog n week kans wees om die wenners van die laaste WOES projek te kan aankondig.

AFSKEID, wat kan mens alles hier onder verstaan en sê . . . 

Afskeid by ‘n graf, Afskeid van ‘n kind wat gaan studeer/trou, Afskeid van ‘n geliefde, Afskeid van familie/vriende wat verhuis/emigreer, Afskeid van ‘n era wat verby is . . . en so kan ons aangaan . . .

Sterkte aan al ons skrywers. Die kompetsie is geldig van 2016-01-06 tot 2016-02-07. KOM WEES ASB DEEL VAN DIE LAASTE PROJEK!

Wees altyd geseënd

Projekbestuurder
Anzé Bezuidenhout


Projek: NUWE

Kere gelees: 3296 | Totale Kommentare: 18

Dis 'n NUWE jaar en die meeste van ons wonder seker wat hierdie twaalf maande gaan inhou. Ons tema vir die eerste Vandag in Woorde vir 2016 is dus NUWE.

'n Nuwe jaar bied gewoonlik die geleentheid om mens se lewe te beskou en te besluit waar en wat jy wil verander. Jy kan miskien 'n nuwe beroepsrigting inslaan, 'n nuwe romanse begin of in 'n nuwe huis intrek. So kan jy ook nuwe voornemens vir hierdie jaar stel … en hopelik daarby hou.

NUWE dui op 'n vernuwing, op die uitskop van ou gewoontes, sienings of goeters. Dis amper soos om jou ou vel af te skud en plek te maak vir 'n nuwe jy.

Wat beteken NUWE in jou lewe? Beplan jy enige nuwe dinge?

Ons sien uit daarna om jou bydraes te lees en jou NUWE ervarings te deel.


Projek: PROJEK – LIEFDE (2015-12-09 tot 2016-01-05)

Kere gelees: 12032 | Totale Kommentare: 410

Die volgende maand is die projek LIEFDE . . . 

Dit is die Feesgety, ons moderator gaan ook n ruskans vat dus gaan die projek n volle maand loop en daarom mag elke lid 4 inskrywings per afdeling plaas.

Ons herdenk ons Verlosser se geboorte op 25 Desember en wat ‘n groter bewys van liefde is daar vir ons as sondaarmense? Maar kom ons dink wyer . . . Ek het so bietjie naslaanwerk gedoen oor verskillende soorte liefde . . .

Agapè liefde – Godelike liefde (Hierdie liefde word in die mens se gees gedra. Hierdie is werklike omgee-liefde.  Emosie speel geen rol in hierdie liefde nie.)
Eros (Storge)liefde – Seksuele liefde (verliefdheid)soos vir jou maat (Die mens beleef erosliefde deur sy liggaam - die vlees).
Filio (Metta) liefde – die liefde vir jou vriende en familie (Word primêr beleef in die mens se siel, sy karakter, daardie deel  wat my maak wie ek in besonder is.) Onvoorwaardelike liefde
Xenia liefde-  liefde vir vreemdes
Narsistiese liefde – Eie of self liefde
Patriotistiese liefde – liefde vir Volk en Vaderland
Fetish – liefde vir snaakse goed

Jou opdrag is om een van hierdie liefdes DUIDELIK UITKENBAAR te kom vaspen. NOEM asb die liefde wat jy uitbeeld in jou inskrywing se OPSKRIF in hakkies.

Wees altyd geseënd

Projekbestuurder
Anzé Bezuidenhout


Projek: KERSFEES

Kere gelees: 4556 | Totale Kommentare: 139

Dis byna die einde van die jaar en meeste van ons is besig om klaar te maak by die werk, dringende projekte af te handel en af te rond. In winkelsentrums hoor ons Kersfeesmusiek en kersversierings is reeds oral te bespeur.

Kersfees is 'n spesiale tyd; 'n tyd wat ons afsonder om tot ruste te kom na 'n dol jaar en saam met geliefdes spandeer. Maar, Kersfees het ook 'n unieke, besondere betekenis vir elkeen van ons.

Wat is jou belewenis van Kersfees? Hoe spandeer jy die feestyd? Is daar dalk 'n spesiale boodskap wat jy met ons wil deel?

Vandag in Woorde se tema is KERSFEES vir die res van Desember.
Deel gerus staaltjies oor Kersfees, mooi herinneringe en jou spesiale Kersfeesgedigte met ons.

Mag hierdie feestyd baie mooi en spesiaal wees vir jou en jou geliefdes.
Carol xxx


Projek: SPYT

Kere gelees: 2208 | Totale Kommentare: 52

Om deel te neem aan hierdie week se tema vir Vandag in Woorde, sal eerlikheid van jou verg. Ook ’n bietjie kopkrap en dink. Bedink. Herdink. En weer dink. Hierdie week kan jy al jou SPYT uit die trousseaukis of skatkis op die solder loop haal.

Een ding wat ’n feit soos ’n koei is, is dat SPYT altyd te laat kom. SPYT oor dinge wat nie ongedaan kan raak nie. Te laat vir ’n spesifieke situasie, maar aan die positiewe kant gereken, sal SPYT ’n goeie les wees om te leer. Ek bedoel nou om toekomstige SPYT in ’n gelyksoortige situasie, te verhoed.

Daar is ook ’n paar dinge wat by herinnering, ’n salige sug oor my lippe stoot. Besluite en aksies waaroor ek beslis nie SPYT is nie. Soos die besluit wat ons geneem het om oë toe te knyp en sak en pak Kaap toe te trek. 


Projek: GELUIDE

Kere gelees: 921 | Totale Kommentare: 28

Die nuwe tema vir Vandag in Woorde is GELUIDE. Vandag vra ek jou om jou oë toe te maak, sodat jy sig uitsny en gehoor die leidende sintuig sal wees.

Eerstens sal jy bewus raak van GELUIDE waarvan jy salig onbewus was. Die buurman se rantsnyer. ’n Hond wat onder in die straat kef-kef. Die gedreun van die swembadpomp. En dan skeur die geluid van ’n knaap wat sy 50cc motorfietsie voluit oopmaak verby my hek, my gehoor in flarde. Dan, later, wanneer alles skielik ophou raas, die GELUID van stilte.

Dis egter maar net die GELUIDE wat elke gewone dag om jou ore hang, maar daar is GELUIDE wat jy slegs in jou gedagtes hoor en niemand anders neem dit waar nie. Die GELUIDE wat jou herinneringe van vervloë tye wakker maak. Soms goeie herinneringe en soms sleg.
 


Projek: KOSBAAR

Kere gelees: 4732 | Totale Kommentare: 65

Die tema vir hierdie week se Vandag in Woorde is KOSBAAR. Of soos die Ingelse sê: priceless. Alhoewel sekere mense juis die dinge wat hoog is in prys, as KOSBAAR beskou.
Ek het vanoggend vir iemand gevra om my kinders mooi op te pas, want hulle is vir my KOSBAAR en dis net daar wat ek gewonder het wat ons Woes-skrywers as KOSBAAR sal bestempel. Ek reken toe dat dit mos maklik sal wees om oor dit wat KOSBAAR is, te skryf.
Soms is ’n oomblik in tyd KOSBAAR. Daar is sekere woorde wat meer gereeld aan KOSBAAR gekoppel sal word, as ander. 


Projek: SOEN

Kere gelees: 1863 | Totale Kommentare: 65

Die nuwe tema vir Vandag in Woorde is hierdie week SOEN. Ja, jy lees reg, SOEN. Hierdie SOEN-tema is so wyd soos die Heer se genade.

Daar is mense wat vies en grillerig met die rugkant van die hand oor die mond vee, na ’n SOEN. Vertel ons meer. Ek self gril my dood vir sekere mense se SOEN.

Wie sal dan ooit daai eerste liefde se eerste SOEN vergeet? Die lam knieë, die engelesang in die ore, die hart wat tamboer teen die agterkant van jou borsbeen, die vlinders in die maag en die uitasem na daai SOEN. En daarna was niks ooit weer dieselfde nie. Vertel ons daarvan. Vertel ons van die een wat die eerste SOEN op jou lippe geplant het. Die plek. Die omstandighede.


Projek: STOEPSTORIE

Kere gelees: 1495 | Totale Kommentare: 47

Het jy geweet dat daar in Rhodes in die Oos-Kaap, elke jaar in Februarie ‘n Stoepsitfees aangebied word? Wel, ek het daar niks van geweet nie. Lees dit gister eers in ’n tydskrif raak en dis net daar dat hierdie week se tema vir Vandag in Woorde, gestalte kry.  Hierdie week skryf jy vir ons ’n STOEPSTORIE!

Dit mag dalk ’n letterlike STOEPSTORIE wees. Ek meen nou iets oor jou stoep of oor iets wat met jou of iemand wat jy ken, op ’n stoep gebeur het. Hier by my adres het daar al vele STOEPSTORIES plaasgevind, want sien, ons het een van daai stoepe waar ons winter en somer land en sand kuier. Inderwaarheid woon ons in die somer op die stoep, maar slaap net binne-in die huis.

Andersins kan jy ’n figuurlike STOEPSTORIE skryf. Dit laat my dink aan Koöperasie-stories wat toeka op TV was.  So ’n STOEPSTORIE is gewoonlik ook ’n skinder storie, wat oorvertel word met ’n lang kronkel stert. Helder ingekleur en voort borduur.  ’n STOEPSTORIE is soms ook ’n lieg-soos-’n-tandetrekker storie.


Projek: WAT AS?

Kere gelees: 1274 | Totale Kommentare: 29

Hierdie week is die tema vir vandag in woorde ’n vraag. Nie sommer net enige vraag nie maar ’n vraag wat ek gereeld oor mense se lippe hoor kom. Ek glo jy hoor dit ook gereeld en spreek dit selfs elke dan en wan uit. Die vraag is:
WAT AS ...?

En ek weet as is verbrande hout, maar WAT AS al die WAT AS vrae geldig is? In hoeveel omstandighede wonder jy: “WAT AS . . .?”

Ouers wonder: “WAT AS my kind deur matriek kom en daar is geen beurs of geld in die bank vir sy studies nie?”

Kinders wonder: “WAT AS ons nie vinnig plek vir my ouers in ’n aftree-oord kry nie?”


Projek: MAAND

Kere gelees: 1139 | Totale Kommentare: 49

Dit tyd loop. Nee, dit hol weg. Kyk waar staan die jaar al weer. Die tema vir hierdie week se Vandag in Woorde, is MAAND. Kan jy glo, na hierdie MAAND is daar net twee oor tot die einde van die jaar? Dis al amper die einde van die ‘Viooltjies in die voorhuis’-MAAND. Die mooiste, mooiste MAAND. Of is dit?
Hierdie week nooi ek jou om oor ‘n MAAND te skryf. Die MAAND wat vir jou die lekkerste is of die meeste betekenis dra. Dalk is dit Februarie omdat betaaldag die vinnigste in hierdie MAAND gebeur. Of is dit Januarie. ’n MAAND van nuut begin, nog ’n kans om vars planne te maak en voornemens te neem.
Nee wag, ek weet. Dis Desember. Die MAAND van gee en ontvang, van partytjies en somervakansie. Van lekker eet en kuier. Tog weet ek uit ondervinding dat die meeste digters liries raak oor die MAAND waarin die herfs begin. Is dit April of Mei?


Projek: PLEK

Kere gelees: 4787 | Totale Kommentare: 62

Die tema vir Vandag in Woorde is hierdie week PLEK. Nie sommer net enige PLEK nie, maar ’n spesiale PLEK. In my lewe is daar ’n PLEK waarna ek altyd verlang. Waaraan ek gereeld dink. Waar ek in my gedagtes spesiale geleenthede en oomblikke herleef. Ek beleef vreugde en vrede op daai PLEK.

Waar is jou spesiale PLEK op aarde? Wat het daar gebeur? Gaan jy gereeld terug na hierdie PLEK? Hoe voel jy wanneer jy daar is en wat onthou jy van daai PLEK uit die verlede? Ek weet daar is ’n PLEK waar Rudi geïnspireer raak om briljante gedigte te skryf. Waar is jou PLEK?


Projek: JOUSELF

Kere gelees: 3223 | Totale Kommentare: 89

Vir hierdie week se tema van Vandag in Woorde, is dit nodig dat jy terug stap op jou eie spore, na ’n tyd toe jy jonk, avontuurlustig en ’n bietjie onbedag was. Dalk wil jy net ’n paar treë of dalk myle en myle terugstap. Die keuse is joune. Jy moet stap tot daar waar jy vir JOUSELF ’n wysheid te sê het. Tot daar waar jy vir JOUSELF, in ’n heelwat jonger lyf of dalk net ’n paar maande jonger, baie goeie raad wil gee.

Dalk het dit met finansies te doen. Dalk met vriendskappe. Ek glo dit sal altyd met keuse te doen hê. Dalk gaan dit oor die keuse van ’n lewensmaat. Of ’n beroep.

As jy nou voor die twintigjarige JOUSELF kon gaan staan, wat sal jy vir hom of haar sê of vertel?


Projek: ETIKET

Kere gelees: 338 | Totale Kommentare: 4

Hierdie week in Vandag in Woorde, skud ons bietjie vere reg. Ons staan regop, skouers terug, ken parallel met die vloer. Ons groet ordentlik en doen dinge soos dit algemeen aanvaarbaar is. Dis reg, hierdie week is die tema ‘ETIKET’.

Vir sommige staan hy dalk glad nie aan nie, maar ek luister alte graag na Nataniël se bydrae op RSG waarin hy ETIKET behandel. Sommige opmerkings is altemit tong-in-die-kies, maar nietemin die heilige waarheid.

Wie kan dan ooit die ETIKET koningin, Emsie Schoeman, vergeet? Kyk, ek glo ook daar is reg en verkeerd. Reg sal nooit verkeerd wees nie en verkeerd nooit reg nie, maar dan is daar mos ook ‘te’. Alles wat ‘te’ is, is verkeerd behalwe te voet en te perd.

Hierdie week kan jy jou lyf Nataniël of Emsie hou! Of jy kan die hele ETIKET besigheid oorboord gooi en die prop uittrek.  


Projek: SELF

Kere gelees: 1918 | Totale Kommentare: 66

In hierdie eerste Vandag in Woorde tema vir die vars lente wat om ons losbars, reken ek dis goed dat ons bietjie in die spieël kyk en ook binnetoe inspekteer. Die nuwe tema om oor te skryf is ‘SELF’.

Toe jy ’n kleuter was en toe jou kinders kleuters was, was dit een van die eerste tekens van SELF-standigheid as ’n kind die woord ‘SELF’ gebruik. Wanneer iemand wil help om knope vas te maak, veters te knoop of te voer, sal hy omswaai sê: ‘Nee, SELF!’

In die moderne digitale wêreld het dit mode geraak om SELF-ies te neem. Doen jy dit?
Het jy al in ’n boekwinkel gesien hoeveel SELF-help boeke is op die rakke. Die goed verkoop soos soetkoek. As dit so maklik is om jou-SELF te help, dan wonder ek hoekom daar nog vele hulpelose mense is.

Daar is so baie vertakkings van SELF waaroor ons hierdie week ’n eiertjie kan lê:
SELF-beheersing
SELF-bewus
SELF-geregtigheid
SELF-sugtig
SELF-kritiek
SELF-aansitter
SELF-bestuur
SELF-moord
SELF-kant
SELF-regverdiging
SELF-onderrig
SELF-respek   .......


Projek: Woord-uitdaging Augustus

Kere gelees: 905 | Totale Kommentare: 29

Nou ja, al maak die weer nes dit lus het en stuur soms sneeu in die somer en somerweer in die winter, is Augustus die laaste maand van die winter. Wag…wag… moenie op my skree nie. Dis my opinie en jy is geregtig op jou eie.

Sommer net omdat dit ook my opinie is dat September die begin van die lente beteken en lente altyd verandering bring, reken ek dis weer bietjie tyd vir iets anders hier in Vandag in Woorde. Daarom dan daag ek jou weer uit om te skryf met of oor ses woorde.

Hier is die woorde:

Impulsief
Negatief
Realisties
Vredeliewend
Miserabel
Ongeskik

Al wat jy moet doen, is om vir ons ’n storie te bou wat al ses hierdie woorde of verbuigings daarvan, bevat.

Enige genre sal doen. Jy het, of het dalk nie opgemerk nie, maar al ses woorde is karaktertrekke van die mens. Bekyk ’n paar mense en beskryf hulle vir ons. Ek reken ons kan ’n paar oorspronklike, unieke en kreatiewe werkstukke verwag.

Ons sal moet wag en sien wat daag hier op ons werf op.

Intussen wens ek jou al die uitbundige vreugde wat met die lente gepaard gaan, toe.

Boland-groetnis
Kiekies.


Projek: LIED

Kere gelees: 2646 | Totale Kommentare: 72

Die tema vir hierdie week se Vandag in Woorde is LIED. Is die lewe dan nie ’n LIED nie?
’n Jolige opgewekte opkikker-LIED, noudat die lente om net die volgende hoek op die punte van haar tone rondtrippel, in afwagting om haar verskyning te maak. Hierdie tyd van die jaar ontstaan daar spontaan ’n LIED in my hart.

Elke LIED wat ek ken, bring herinneringe. Soms veroorsaak die LIED hartseer en verlang. Soms veroorsaak ’n LIED kriewels in my maag en lekkerkry in my siel. Sal ek dan ooit die LIED vergeet waarop ek en Bokka die baan geopen het, daai dag toe ons elkeen ’n hand in die boeie van ons huwelik gesteek het. Of die LIED wat ’n ou liefde onder my koshuiskamer se venster kom sing het?


Projek: Toeval

Kere gelees: 1031 | Totale Kommentare: 36

http://www.woes.co.za/bydrae/rubriek/viw-toeval Kom vertel vir ons hierdie week van die wonderlike TOEVAL wat al jou lewe binne geval het. Vertel ons wat sou die gevolge wees indien daardie TOEVAL nie gebeur het nie. Vertel ons wat die resultaat van die TOEVAL toe was.


Projek: KIES

Kere gelees: 3158 | Totale Kommentare: 72

Hierdie week se tema vir Vandag in Woorde is KIES. Dit lê my na aan die hart, aangesien ons in ons lewens voor ’n baie moeilike keuse staan.

Hierdie week vra ek dat jy ons sal vertel, in die genre wat jy ver-KIES, hoe mens KIES. Hoe besluit ’n mens? Wat is die deurslaggewende faktore wanneer jy moet KIES?

Vertel ons van ’n keer wat jy reg ge-KIES het of selfs toe jy verkeerd of dom ge-KIES het. Ek het onlangs iewers gelees dat ’n mens nooit twee maal dieselfde fout maak nie. Die eerste keer was dit ’n fout. Die tweede keer het jy geweet dis ’n fout, maar ge-KIES om dit tog maar weer te doen. 


Projek: HALF

Kere gelees: 2201 | Totale Kommentare: 65

Omdat ons so pas HALF-pad deur 2015 is, het ek gedink dis ’n goeie idee om hierdie week se tema vir Vandag in Woorde ‘HALF’ te maak. Verbasend is daar nogal ’n hele paar Afrikaanse gesegdes en spreekwoorde wat van HALF praat, o.a.
Liewer ’n halwe eier as ’n leë dop.

Is jou glas HALF-vol of HALF-leeg?

Pa het altoos gesê: ‘My kjint as jy ’n ding HALF wil doen, moet liewer nie eers begint nie.’

HALF-pad is nog lank nie al die pad nie.

Ek het so bietjie gaan Googloer vir die definisie van HALF en dit beteken: twee gelyke gedeeltes van een hele.  Ons praat ook van die HALF-maantjies op ons vingernaels. Wanneer ek benoud raak sal ek praat van HALF bang. So ook praat ons van HALF onseker, HALF gefrustreerd, HALF bedremmeld, HALF-gaar of HALF-rou. Wat van HALF-broer of –suster.

En HALF-eindrondte vir die Super 15 en Half-jaarlikse verslae in ’n besigheid




Toe Snoeks nog Snoekie was

deur Manie Jackson

“Toe Snoeks nog Snoekie was” Is ‘n storie wat vertel word deur die klein malteser, Snoekie. eindlik is die storie vertelle my ma , Babs Lourens. Dit is die storie van al haar mense en die ander diere wat op die kleinhoewe net buite Pretoria saam met haar gebly het. Dis werklike gebeure en mense, dit begin ongeveer in 1995 – oor ‘n tydperk van ongeveer 6 jaar, geen fiktiewe karakters nie, net die gebeure uit die jong hondjie se oogpunt.



picture

Kompetisies

Kyk watse opwindende kompetisies tans beskikbaar is

picture

Nuusbriewe

Registreer nou om nuusbriewe van Woes te ontvang

picture

Winkel

Woes skrywers wat self publiseer se boeke is in die winkel beskikbaar