Projekte: Vandag in woorde

Projek: Grys

Kere gelees: 116 | Totale Kommentare: 27

Waaraan herinner GRYS jou? Is dit jou skooldae of gemoed? Die berge, die seisoen of die lekkertes van ’n GRYS winterdag? Skryf daaroor in die genre van jou voorkeur.


Projek: KIES

Kere gelees: 504 | Totale Kommentare: 60

Hierdie week se tema vir Vandag in Woorde is KIES. Dit lê my na aan die hart, aangesien ons in ons lewens voor ’n baie moeilike keuse staan.

Hierdie week vra ek dat jy ons sal vertel, in die genre wat jy ver-KIES, hoe mens KIES. Hoe besluit ’n mens? Wat is die deurslaggewende faktore wanneer jy moet KIES?

Vertel ons van ’n keer wat jy reg ge-KIES het of selfs toe jy verkeerd of dom ge-KIES het. Ek het onlangs iewers gelees dat ’n mens nooit twee maal dieselfde fout maak nie. Die eerste keer was dit ’n fout. Die tweede keer het jy geweet dis ’n fout, maar ge-KIES om dit tog maar weer te doen. 


Projek: HALF

Kere gelees: 621 | Totale Kommentare: 61

Omdat ons so pas HALF-pad deur 2015 is, het ek gedink dis ’n goeie idee om hierdie week se tema vir Vandag in Woorde ‘HALF’ te maak. Verbasend is daar nogal ’n hele paar Afrikaanse gesegdes en spreekwoorde wat van HALF praat, o.a.
Liewer ’n halwe eier as ’n leë dop.

Is jou glas HALF-vol of HALF-leeg?

Pa het altoos gesê: ‘My kjint as jy ’n ding HALF wil doen, moet liewer nie eers begint nie.’

HALF-pad is nog lank nie al die pad nie.

Ek het so bietjie gaan Googloer vir die definisie van HALF en dit beteken: twee gelyke gedeeltes van een hele.  Ons praat ook van die HALF-maantjies op ons vingernaels. Wanneer ek benoud raak sal ek praat van HALF bang. So ook praat ons van HALF onseker, HALF gefrustreerd, HALF bedremmeld, HALF-gaar of HALF-rou. Wat van HALF-broer of –suster.

En HALF-eindrondte vir die Super 15 en Half-jaarlikse verslae in ’n besigheid


Projek: Julie Woorduitdaging

Kere gelees: 513 | Totale Kommentare: 28

Ons het so lanklaas ’n woord uitdaging gehad dat ek reken dis nou weer sulke tyd. Die tema vir hierdie week se Vandag in Woorde is dan woord uitdaging. Ek het my bes gedoen om hierdie keer van ons lekkerste beskrywende Afrikaanse woorde te gaan uitkrap.  Woorde wat op ’n verskeidenheid maniere gebruik kan word.

Vandat on laas ’n woord-uitdaging gehad het, het daar al weer heelwat nuwe lede bygekom. Ek nooi ieder en elk om aan die uitdaging deel te neem. Almal wat elke keer deelneem en almal wat nog nooit probeer het nie. Almal word genooi om in die genre van jou eie keuse en voorkeur vir ons ’n storie, gedig of liedjie om hierdie ses woorde te bou.


Projek: Foto uitdaging: Foto 7

Kere gelees: 382 | Totale Kommentare: 27

Die tema vir hierdie week van Vandag in Woorde is weer ’n foto. Ek glo dat hierdie foto ’n verskeidenheid gedagtes by elke skrywer kan wakker maak. Stories van gister, vandag en môre. Waar jy al gestap het, nou loop, of môre graag wil stap. Nee wag ek het nou genoeg gesê.

Ek verduidelik net weer hoe dit werk:

Laat val die teuels van jou verbeelding om vry te galop terwyl jy die foto bestudeer. Luister na jou gedagtes. In vandag se foto is daar nie veel te sien nie, maar heelwat om te hoor. Dit wat  jou gedagtes uitspreek, skryf jy vir ons in ’n gedig, kortverhaal, rubriek, artikel, gorrel of liriek.

Ek sien uit na alles waarmee al die talentvolle skrywers van Woes hierdie week sal opdis!

Tot volgende week, raak stil, luister fyn en lekker skryf.


Projek: HOE

Kere gelees: 1224 | Totale Kommentare: 127

Goeie môre. HOE gaan dit met jou?

Hierdie week is die nuwe tema vir Vandag in Woorde, ’n kort en kragtige ‘HOE’. Ja man, en jy mag maar dink: ‘HOE-HOE sê die uil’. . . en selfs daaroor skryf as jy wil.
Ek het net besef die hele lewe gaan oor een of ander HOE. Kyk nou maar hier op Woes:
HOE skryf mens ’n gedig?
HOE hou ek my leser se aandag?
HOE publiseer ek ’n boek of bundel?
HOE weet ek my skryfwerk is aanvaarbaar, wat nog te sê goed?

Daar is ook ’n hele rits HOE-vrae in die alledaagse lewe:
HOE neem ek wyse besluite en HOE bly ek daarby?
HOE weet mens dis die regte man of vrou vir jou?
HOE weet mens jou huwelik is op die rotse?
HOE stap jy weg of HOE beur jy voort?


Projek: BEDERF

Kere gelees: 661 | Totale Kommentare: 61

Die nuwe tema vir hierdie week se Vandag in Woorde is BEDERF. Dis omdat ek nou swaarkry, nadat ek BEDERF was met my Bokka wat heeldag by my was en hier uit die huis uit gewerk het. Nou is hy in ’n kantoor in die stad en ek het niemand meer om my te BEDERF nie. (Snuif-snuif)

BEDERF is nou een van daai woorde wat twee algeheel en toetentaal teenoorgestelde konnotasies het. Die eerste BEDERF is onaangenaam, nl. Sleg/vrot word. Dink maar aan vleis of groente of vrugte wat BEDERF geraak het. Ewe onaangenaam is ’n kind wat te veel BEDERF word of was en nou eintlik ook vrot is in die samelewing. ’n Bedorwe brokkie.

Nog ’n BEDERF wat negatief is, is wanneer jy jou oë bederf deur in swak lig te lees of in skerp lig te werk sonder die nodige beskerming.

Tog is BEDERF ook goed en mooi. ’n Man of vrou kan die wederhelf BEDERF met iets waarvan die persoon beslis sal hou, soos kaartjies vir die rugby of Russiese ballet. Of sommer net Lindt sjokolade of ’n sak biltong. Ek was die afgelope tyd kort-kort BEDERF met ’n beker vars koffie of rooibostee met heuning en suurlemoen, nes ek daarvan hou.


Projek: SWART

Kere gelees: 1243 | Totale Kommentare: 121

Ek het gereken dat dit hoogtyd is dat ons weer ’n slag ’n kleur as tema moet hê. Hierdie week se Vandag in Woorde tema is ‘SWART’.Waaraan laat hierdie pik-SWART tema jou dink? Skryf dit! In die genre van jou keuse. Dink binne of buite die boks, nes die gier jou pak, maar SKRYF DIT.


Projek: BOEKRAK

Kere gelees: 927 | Totale Kommentare: 52

Die tema vir Vandag in Woorde is hierdie week ‘BOEKRAK’. Vergun my asseblief om hierdie bobbejaan nou eers doer vêr agter die berg te loop haal. Ter verduideliking hoe ek by hierdie tema uitgekom het, want dalk help dit jou om ’n bydrae uit te dink.

So week of wat gelede, kuier ek en KB-Carol op die skerm m.b.v. Skype. Dis hoe ons ons werk afgehandel kry en sy my orders uitdeel. Sy vertel toe vir my dat sy in haar woonkamer ’n BOEKRAK het wat een hele muur bedek. En dat sy daai BOEKRAK op die vakansiedag getakel het om orde te skep in haar woord-wêreld. Daarom het sy nou een hele rak vir haar goeie Afrikaanse letterkunde en een vir die goeie Engelse boeke en nog een vir haar klassieke werke en verder luister ek toe nie meer nie, want my verbeelding sit op loop.

Ek sien in my gedagtes een van daai pragtige stinkhout of swarthout dak-tot-vloer en muur-tot-muur boekrakke wat ons veral in die Europese ou herehuise sien. Ingerig met ’n trapleer waarteen mens kan opklim om ’n boek in die hoogste hoek van die BOEKRAK af te haal. Ek sien boeke in leer buiteblaaie met krakerige vergeelde bladsye en die skrywer se handtekening met ’n vulpen geskryf. En. . . en. . .

Ek vra toe vir KB om vir my twee titels elk te noem van wat sy beskou as haar goeie Afrikaanse en goeie Engelse werke op haar BOEKRAK. Dit was egter nie genoeg om my nuuskierigheid te stil nie. Daarom vra ek vandag vir jou wat hier lees: Vertel ons van jou BOEKRAK en sy inhoud. Of enige BOEKRAK wat jou diep beïndruk het.


Projek: Soms

Kere gelees: 1101 | Totale Kommentare: 76

Die nuwe tema vir Vandag in Woorde is hierdie week ‘SOMS’. Dis ’n woord wat wispelturigheid of verandering van emosie aandui. Soms pla goed my en ander kere is dit water op die eend se rug. SOMS wonder ek oor dinge van die verlede, die hede en die toekoms, maar ander kere aanvaar ek net gelate.

Die verklarende woordeboek sê so van SOMS:
Nou en dan
Van tyd tot tyd
Partykeer
As iets nie gewoonlik is nie, dan is dit SOMS.

Dis waar dat gedagtes aan die toekoms, my SOMS benoud maak. Wat is dit in jou lewe, werk, verhoudings of omstandighede, wat gewoonlik nie ’n pyn of probleem is nie, maar SOMS...net SOMS.....dan krap en kriewel dit in jou hart of kop of gevoelens. Vertel ons daarvan. Van al die SOMS-dinge in jou bestaan.

Al is SOMS nie baie nie, kan dit ook een keer te veel wees. Jy weet mos wat word gesê van die laaste strooihalm wat die esel se rug sal breek. Tog kan SOMS ook die lewe die moeite werd maak. Daai dinge wat jy SOMS doen, of wat SOMS vir jou gedoen word, wat jou weer laat asem skep, laat glimlag, laat ontspan. Laat lewe, inplaas van maar net bestaan.


Projek: DOM

Kere gelees: 1115 | Totale Kommentare: 50

Die tema vir hierdie week se Vandag in Woorde is DOM. Dit maak nie saak hoe hoog jou IK, jou status, jou salaris of jou bankbalans is nie. Iewers in jou lewe het jy al ’n DOM ding aangevang. As jy nou hier op ons werf in die stof rond skrop en van jou DOM vertel, dan red jy dalk een van ons van die einste DOM.

Die eintlike rede hoekom ek DOM as tema gekies het, is omdat ek weer deesdae voel dat ek al DOM-mer word as ek so om my rondkyk en waarneem. Veral as ek na omstandighede in ons land kyk en die besluite wat die kabinet maak. Ek probeer my uiterste om nie negatief te raak nie, maar teen DOM het ek geen raad nie. Daar is nie eers ’n pil of stropie of inspuiting of serum of selfs ’n setpil teen DOM nie. My kind praat van so DOM soos grond. En my pa het gepraat van so toe soos ’n klei-os se linker oor. Dit voel vir my ek is op pad na daai graad van DOM.


Projek: WOORD-UITDAGING vir April

Kere gelees: 979 | Totale Kommentare: 35

WOORD-UITDAGING vir April
Vandag in Woorde bied jou hierdie week weer ’n heerlike woord-uitdaging om jou vernuf met woorde te toets. Ons het so lanklaas ’n Woord-uitdaging gehad, dat ek al amper van so iets vergeet het. Gelukkig het Toom my weer ’n slag wakker geskud en hierdie uitdaging dra ek amptelik op aan oompie Toom. Baie van die Woestelinge, het die vorige uitdagings soos ’n bul aan die horings gegryp en bulkend op die rooi woord-lap afgejaag, in een groot stofwolk.
Om al ons nuwe Woestelinge in te lig oor hoe dit werk en sommer ons ouer Woestelinge weer te herinner, verduidelik ek net gou weer die reëls.
Nou kyk, dit werk so:
1. Ek gee vir jou ses woorde.
2. Jy moet al ses die woorde in jou bydrae gebruik.
3. Skryf in enige genre van jou voorkeur of plak sommer net ’n gorrel.
4. Gee eers die ses woorde, voor jy begin skryf of skryf dit in skuinsdruk in jou bydrae. (Jy onthou mos, daar is van ons wat maklik vergeet wat die woorde was.)
5. Jy mag ’n verbuiging van die woord gebruik om by jou tema aan te pas, solank een van die ses woorde die basis vorm, bv. Vang wat vervang word.
6. Onthou om die woord ‘Uitdaging’ by jou titel te heg, dan kan ons sommer die bydraes dadelik opspoor.
Dis so maklik soos uit die boom val.
Hier is die ses woorde:
Diskreet
Kalwe
Opsnork
Stem
Troef
Wan

Nou toe: vat hom vas Asjas, laat waai Meraai en lekker skryf Olyf!




Die Ander Vrou

deur http://www.woes.co.za/

Die boek belig 'n wereld oue situasie uit die perspektief van die "ander vrou"- soos deur die vroue self vertel Die boek sluit ook perspektiewe deur 'n maatskaplike werker en 'n predikant in.



picture

Kompetisies

Kyk watse opwindende kompetisies tans beskikbaar is

picture

Nuusbriewe

Registreer nou om nuusbriewe van Woes te ontvang

picture

Winkel

Woes skrywers wat self publiseer se boeke is in die winkel beskikbaar